ЕМХАНАЛАРҒА ҮЗДІК ТӘЖІРБИЕЛЕР ОРТАЛЫҒЫНЫҢ ЖОБАСЫ ЕНГІЗІЛМЕК

Шымкенттегі емханаларға үздік тәжірибелер орталығының жобасы енгізілуде. Бұл жобаның ең басты бағыты — емдеу мекемелеріндегі әлеуметтік салалармен тығыз байланыста жұмыс жасау. Озық практика бойынша медициналық ұйымдарға өзгеріс енгізу мақсатында, медицина ғылымдарының докторы, профессор Төлебай Рахыпбеков қаладағы емдеу мекемелерін аралап шығып, жұмысымен танысты. Шымкенттегі жұмыс сапар аясында «Premy Health Care» ұлттық ассоциациясының өкілдері, денсаулық сақтау басқармасының қызметкерлері, және емхана бас дәрігерлері тәжірибелер орталығы моделін бастапқы медициналық-санитариялық емдеу мекемелеріне енгізу мәселелерін талқылады. Жоспар бойынша, 2023 жылы медициналық-санитарлық алғашқы көмектің үздік практика орталығы жобасы №1, №3, №6, және №7 қалалық емханаларында енгізілетін болады. Жаңа жобаның мақсаты- халықтың өмір сүру деңгейін арттыру, науқастарға сапалы және жедел көмек көрсету, озық инновациялық технологияларды пайдалану, мамандардың кәсіби біліктілігін арттыру болатын.

КШымкент қаласы бойынша үздік тәжірибе орталығы әзірге төрт емханаға енгізілмек. Озық МСАК практикасын енгізу бойынша емхананың бас дәрігерлері арнайы оқудан өтіп, кәсіби бліктілігін шыңдады. Бұдан бөлек жыл соңына дейін өзге де емдеу мекемелеріне озық тәжірибелер жобасын енгізу жоспарлануда.

Айта кетейік, Еңбекшіқазақ ауданы озық тәжірибелерді енгізудің табысты нәтижелерін көрсетуде. Мәселен, халықтың МСАК-ке медбикелер мен әлеуметтік қызметкерлерге жүгіну саны 100 еседен астам, отбасылық дәрігерлерге жүгіну саны үш есеге, ал бейіндегі мамандарға жүгіну саны 50% — ға азайған.