Бүгін ел тарихында есімі алтын әріппен жазылған бірегей тұлға, Мемлекет және қоғам қайраткері Бердібек Машбекұлы 71 жасқа қараған шағында өмірден өтті.
Сапарбаев Бердібек Машбекұлы. Бұл азаматты елімізде танымайтын жан кем болар сірә. Өйткені бір емес, бес облыста әкім болып, іскерлігімен танылған тұлға. 2023 жылы 70-жасты бағындырған мемлекет және қоғам қайраткері бағдарламаның басты кейіпкері.
Бердібек Машбекұлы 1953 жылы 9 ақпанда Мақтаарал ауданындағы Алғабас ауылында туған.
1977 жылы Алматы Халық шаруашылығы институтын «Экономика және материалдық-техникалық жабдықтау» мамандығы бойынша бітірді.
Экономика ғылымдарының докторы, профессор.
Еңбек жолын Қызылорда облысының Задарьинский совхозының жұмысшысынан бастады (1969-1971 жылдары); әскери қызметін өткерді (1971-1973 жылдары).
Институтты бітірісімен Республикалық мемлекеттік еңбек жинақтау кассалары (гострудсберкассы) басқармасында экономист (1977); ҚазКСР Қаржы министрлігінде экономист, аға экономист, жетекші, бас экономист, бөлім бастығының орынбасары (1977-1988 жылдары); жоспарлау-қаржы басқармасының бастығы, Бас экономика басқармасының бастығы, Қазақстан Республикасы Білім министрінің орынбасары (1988-1993 жылдары); Президент Аппараты бөлімі мен Қазақстан Республикасы Министрлері кабинеті меңгерушісінің орынбасары (1993); Қазақстан Республикасы Министрлер кабинеті Істер басқармасының Қаржы, еңбек және әлеуметтік қорғау бөлімі меңгерушісінің орынбасары және меңгерушісі (1994-1995 жылдары) болды.
Қазақстан Республикасы Министрлер кабинеті Аппаратының басшысы (1995); Қызылорда облысының әкімі (1995-1999 жылдары); Оңтүстік Қазақстан облысының әкімі (1999-2002 жылдары) қызметтерін атқарды; Қазақстан Республикасы Кедендік бақылау агенттігінің төрағасы, Қазақстан Республикасы Қаржы вице-министрі — Кедендік бақылау комитетінің төрағасы (2002-2006); Премьер-Министр Кеңсесі басшысының орынбасары — Қазақстан Республикасы Парламентіндегі Үкіметтің Өкілі (2006-2007); Қазақстан Республикасының Экономика және бюджеттік жоспарлау вице-министрі (2007 жылы ақпан — 27 тамыз).
2007 жылдың тамызынан Қазақстан Республикасының Еңбек және халықты әлеуметтік қорғау министрі. 2009-2014 жылдары — Шығыс Қазақстан облысының әкімі. 2014-2015 жылдары – Қазақстан Республикасы Премьер-Министрінің орынбасары.
2015-2019 жылдары – Ақтөбе облысының әкімі.
2019 жылдың ақпан-тамыз айларында Қазақстан Республикасының Еңбек және халықты әлеуметтік қорғау министрі болды.
2019-2020 ж. ж. – Қазақстан Республикасы Премьер-министрінің орынбасары.
2020-2022 жылдары Жамбыл облысының әкімі болды.
«Құрмет» (1999), «Парасат» (2007) ордендерімен, «Астана» (1998), «Қазақстан Республикасының тәуелсіздігіне 10 жыл» (2001), «Қазақстан Республикасының Конституциясына 10 жыл» (2005) медальдарымен марапатталған.
Көрнекті Мемлекет және қоғам қайраткері Бердібек Сапарбаевтың дүниеден өтуіне байланысты отбасы мен туған-туыстарына қайғысына ортақтасып, көңіл айтамыз.
Қазақстан Республикасының Мемлекет қайраткері, асыл ағамыз Бердібек Машбекұлы Сапарбаевтың өмірден өтуіне байланысты:
Қонақ асы — 10-маусым күні Астана қаласы, Хазірет Сұлтан мешіті, сағат 19.00.
Қоштасуы 11-маусым күні Алматы қаласы, Абай атындағы КазНТОБ (ГАТОБ) , сағат 10.00
Жаназасы сол жерде сағат 11.00.
