Көк тудың желбірегені,
Жаныма қуат береді…
4 маусым — Мемлекеттік рәміздер күні. Мемлекеттік рәміздердің бекітілгеніне де 31 жылдың жүзі толып отыр. Елдікті айшықтайтын мерекені тойлауда шымкенттік тұрғындар да қалыс қалған жоқ.
Қаламызда Қазақстан чемпионатының 12-ші туры аясында Ордабасы мен Атырау командалары арасында тартысты матч өтті. Ойынның ашылу салтанаты сәтінде 4 маусым – Мемлекеттік рәміздер күніне арнайы ҚР Еңбек сіңірген әртісі, Мемлекеттік сыйлықтың лауреаты, опера әншісі Майра Мұхамедқызымен бірге орталық стадионға жиналған 23 мыңнан аса жанкүйер бір мезетте еліміздің әнұранын тік тұра шырқады. Көк туымыз қалықтаған аспан астында шабыт алған футбол шеберлерінің бұл ойыны тартысқа толы болды. Матч қорытындысы бойынша Ордабасылықтар қарсылас команданы 2:1 есебімен жеңіп, қала абыройын асқақтатты. Ойын барысы жанкүйерлерге тамаша әсер қалдырды. Бұл ойынды көруге келген жанкүйерлердің көңіл-күйінен айқын байқалып тұрды.
Сонымен қатар, 4 маусым күні атаулы датада шымкенттіктер Тәуелсіздік саябағына жиналып, мемлекет үшін маңызды мерекені тойлатты. Жастар мен зиялы қауым өкілдері қатысқан ресми салтанат барысында әлем чемпионы Махмұд Сабырхан барша қазақстандықтарды мерекемен құттықтап, ақ жарма тілегін білдірді:
— Бүгінгі мерекемен барша қазақ елін құттықтаймын! Әлем чемпионатында көк туымыз желбіреп, Әнұран шырқалды. Бірақ, орта тұсына келгенде біздің Әнұран өшіп қалғанда барша қазақстандықтар жанды дауыста шырқап, одан сайын рух берді. Сол үшін алғыс білдіремін!
Депутаттар, әскерилер, мәдениет және спорт шеберлері қатысқан мереке арнайы шерумен жалғасты. Қала тұрғындарымен ұйымдастырылған 50 автокөлік және 80 велоспортшы көк туды желбіретіп, қала көшелерімен жүріп өтті. Ордабасы алаңынан басталған салтанат Бәйдібек би ескерткішіне дейін жалғасып, тұрғындарды тамсандырды. Мерекелік күннің абыройын асқақтатқан велоспортшылар қатарында кәсіби спортпен айналысып жүрген тұрғындар бар. Күннің аптап ыстығына қарамастан шерумен жүріп өткен спортшылар шараға дән риза екенін жеткізді.
Рәміздер — елдің ұлттық болмысын, тәуелсіздігін күллі әлемге танытатын белгі. Патриоттық әндер шырқалған шарада әр қала тұрғынының қолындағы көк ту бойға рух беріп, көңілге қуаныш сыйлағаны анық. Елтаңбамыз елдігімізді айғақтап, байрағымыз ашық аспан астында мәңгі желбірей берсін!
