БІЛІМ ОРДАСЫ БАҚЫЛАУДА

«AMANAT» партиясы Шымкент қалалық филиалының партиялық бақылау комиссия мүшелері мегаполистегі аяқталған және салынып жатқан білім беру мекемелеріне зерделеу жұмыстарын жүргізді. Анығырақ айтсақ, партияластар М.Х.Дулати атындағы №8 мектеп-гимназиясы және Н.Оңдасынов атындағы №38 мектеп-гимназиясында болып, қосымша салынып жатқан оқу ғимараттарының құрылыс жұмыстарын және сапасын тексерді. Білім ордаларында орын алып жатқан олқылықтар түзетілді ме? Қолданысқа берілген мекеменің жай күйі қандай? «BUILD STROY» ЖШС мекемесінің жұмысы 2021 жылы тамыз айында бастау алған. Жыл сайын оқушы саны артып отырған М.Х.Дулати атындағы 8 ші мектепке шахар басшысы М.Әйтенов керегесін кеңейтуді көздеді. 2 жыл уақытқа жоспарланған құрылыс Нысанының сапасына партияластар жиі бақылау жүргізеді. Бекітілген өндірістік жұмыс кестесінен кешіккені үшін Аманат партиясының мүшелері мердігер мекемеге айыппұлдар салып, жауаптыларға кеткен кемшіліктерді реттеуді тапсырған болатын. Қазіргі кезде барлық олқылықтар жойылып, құрылыс қарқынмен жүргізілуде дейді қалалық білім басқармасының басшысы. Бақылаушылар жұмысшы санының аз екенін айтса, Мердігер компания қызметкері жаңа мектеп жоспарланған күнтізбеге сай аяқталатынын айтып ақталды. Оқушыларға үш тілде білім беретін №8 мектеп-гимназиясы Шымкент қаласындағы ең көне мектеп. Ал жаңа ғимарат 1 100 оқушыға жоспарланған. Жобада қаралған 250 орындық АКТ залы, спортзал, 30 мыңға жуық кітап қоры бар кітапхана мен 320 орындық асханасы бар. Жалпы айтқанда 3.4 млрд теңгенің құнын құрайтын бұл білім ордасы үшін сапалы жабдықтармен қамтамасыз етілуде дейді қалалық құрылыс басқармасы әлеуметтік нысандар бөлім басшысы Бағлан Үсенұлы. Ал 18 ші ықшам ауданындағы №38 гимназияның қосымша ғимараты өткен жылы аяқталып, қолданысқа берілген. Екі жылда 375 орындық нысан бой көтеріп, екі ауысымда балалар білім алуға көшті. Айта кетейік, Шымкентте 2023-2027 жылдар аралығында 50 мектептің құрылысы жүргізіледі. Оның 25-і «Жайлы мектеп» Ұлттық жобасы аясында салынбақ. Мектептер пайдалануға берілгенге дейін оған қатынайтын автомобиль жолдары, қоғамдық көлік бағыттары мен көшелерді жарықтандыру мәселелері де толығымен шешілмек. Сайлауалды бағдарлама аясында салынып жатқан құрылыс нысандарына партиялық бекеттері қойылып, сол құрылыстың уақытылы әрі сапалы орындалуы жолында партиялық бақылау комиссиясы мониторинг жүргізіп отырады.
Нәтижесінде оқушы орындарының тапшылығы, үш ауысымды және ескірген мектептердің саны азаюда.