7 мамыр – Отан қорғаушылар күні — халқымызға тән батырлық пен ерліктің, Отансүйгіштіктің мерекесі. Естеріңізге сала кетсек Қазақстан Республикасында 7 мамырда атап өтілетін мемлекеттік мереке. 1992 жылғы 7 мамырда сол кездегі Мемлекет басшысы Нұрсұлтан Назарбаевтың Жарлығымен Қазақстан Республикасының Қарулы Күштері құрылды. Дәл осы күні республика аумағындағы КСРО Қарулы Күштерінің құрамындағы мекемелер, бөлімдер, құрамалар Қазақстан Республикасының құзыретіне берілді. Айтулы күннің жас буынды патриоттық бағытта тәрбиелеуде маңызы айрықша. Өскелең ұрпақты ерлікке үндейтін мерекелік іс-шаралар шеруі Шымкентте бүгіннен басталып кетті.
Қала әкімі Мұрат Әйтенов 7 мамыр – Отан қорғаушылар күніне арналған салтанатты жиынға қатысты. Сахна төріне еліміздің Мемлекеттік Туы салтанатты жағдайда шығарылып, Мемлекеттік Гимн шырқалып, көпшіліктің рухын көтерді.
«Биыл Қазақстан Қарулы Күштерінің құрылғанына 31 жыл толып отыр. Осы жылдар арылығында ұлттық армиямыз түрлі даму сатыларынан өтіп, жылдан жылға қуаты артып келеді. Бүгінде дайындық деңгейі жоғары, жауынгерлік рухы асқақ, заманауи қару-жарақ және әскери техникамен жабдықталған. Айбынды армиямыз – тұғырлы Тәуелсіздігіміз мен мемлекетіміздің берік қорғаны болып табылады” — деді қала әкімі. Ғасырлар бойы халқымызда «Отан қорғаушы» сөзі адамгершілік мағынасы мен қасиетті ұғымға ие. Отан қорғаушылар әрқашан патриотизм мен өз халқына адал қызмет етудің, ар-намыс пен ерліктің, батылдық пен батырлықтың көрінісі болады, өйткені әлемде бейбітшілікке қызмет етіп, өз елін, халқын қорғаудан гөрі жоғары миссия жоқ. Қазақстандықтар Отанымыздың бостандығы мен тәуелсіздігі үшін өмірлерін қиған батырлардың барлық ұрпақтарының ерліктерін еске алады.
Жиында М.Дүйсенбекұлы бір топ әскери қызметкерді Алғыс хатпен марапаттады. Сонымен қатар жиында «Оңтүстік» өңірлік қолбасшылығы әскерлерінің қолбасшысы, генерал-майор Мереке Көшекбаев Қарулы күштердің ардагерлері мен жауынгерлерді мерекесімен құттықтап, жоғары деңгейде қызмет атқарған сардарлар мен сарбаздарды марапаттады.
Жиын соңы сарбаздар мен жергілікті әскери оқу орындары курсанттарының және эстрада жұлдыздарының мерекелік концертіне ұласты.
