Адам денсаулығы – қоғам байлығы. Оның ішінде бала денсаулығы – ұлтымыздың таптырмас байлығы. Барлығымызға ой салатын мәселенің бірі — ортадағы экологияның бұзылуы, бала денсаулығына кейбір технологияның және баска факторлардың, әсер етуі больш отыр, жағымсыз әсерлердің салдарынан адамның физиологиялық, психологиялык және адамгершілік касиеттері мен денсаулығының бұзылуына әкеліп соғады.
Шымкентте дамуында проблемалары бар балалар мен жасөспірімдерді оңалту және әлеуметтік бейімдеу бойынша жүйелі жұмыстар жүргізіліп келеді. Қалалық білім басқармасы тарапынан бұл салада бірнеше бағытта іс-шаралар қолға алынған.
Атап айтқанда, «2023-2029 жылдарға арналған білім беру жүйесін дамыту бойынша өңірлік жол картасының» жоспарына сәйкес, қыркүйек айында психологиялық-медициналық педагогикалық кеңес және бір психологиялық-педагогикалық түзету кабинетін ашу жоспарланған. Сонымен қатар, №1 А.С.Пушкин атындағы мектеп-гимназиясында ресурстық кабинеті қызмет көрсетуде.
Бұдан бөлек, қалада ерекше күтімді қажет ететін балаларды қоғамға тартып, олардың арасында дарынды жандарға қолдау көрсетуде түрлі мәдени іс-шаралар өтіп тұрады. «Ризашылық – мейірімділік бұлағы» жалпыұлттық мәдени білім беру жобасы аясында қалалық «Қазақстан – менің алтын бесігім», «Шексіз шығармашылық» байқауы ұйымдастырылды. «Тең мүмкіндіктер әлемі» «Қоғамға қызмет» жобасы аясында «Өнерліге нұр жауар», «Juldyzai» республикалық балалар шығармашылық фестиваліне талапты өрендер қатысып, жүлделі орындардан көрінді.
Ал, пандемия кезінде салынған модульді жұқпалы аурулар орталығы ендігі кезекте балалар ауруханасы болып қайта құрылмақ. Енді орталық базасында дәрігерлер кішкентай науқастарға түрлі медициналық көмектер көрсетеді.
Емдеу орталығының сыйымдылығы 200 төсек орынға лайықталған. Мұнда реанимация және қарқынды терапия бөлімшесінің 20 орны, КТ аппараты, цифрлық рентген және басқа да медициналық жабдықтар бар. Сондай-ақ ғимарат аумағында оттегі станциясы, автономды электр станциясы, лас қалдықтарды дезинфекциялауға арналған орындар мен жедел жәрдем машиналары қарастырылған.
Осыған дейін инфекциялық госпиталь ретінде жұмыс істеген орталықты науқастарға қауіпсіз ету үшін барлық тиісті шаралар атқарылды. Ғимарат қабырғалары мен медициналық аппараттардан жұғындылар алынып, экспертиза жүргізетін тәуелсіз мекемелерге тексеруге жіберілген. Қорытынды санитарлық талаптарға сай танылып, орталық жұмысына рұқсат берілді.
Ал өткен жексенбіде Дүниежүзілік аутизм мәселесі туралы ақпаратты тарату күніне орай шаһарымызда ерекше күтімді қажет ететін балаларға қызмет көрсететін “Қамқорлық” орталығы іске қосылды.
Жаңа орталықтың ашылуына Еңбек және халықты әлеуметтік қорғау вице–министрі Ербол Оспанов, қала әкімі Мұрат Әйтенов және «Қазақстан Халқына» қоғамдық қорының басқарма төрағасы Болат Жамишев пен «Самұрық-Қазына»АҚ, «Samruk-Kazyna Trust» Корпоративтік қорының өкілдері қатысты. Орталықтың ашылуына арналған жиында қала әкімі арнайы сөз сөйлеп, ерекше балаларды оңалтуда мекеменің маңыздылығына тоқталды.
«Бұл орталықта аутизм дертіне шалдыққан балаларға заманауи әдістер бойынша оңалту, өмірге бейімдеу шаралары жүргізіледі. Ғимарат «Қамқорлық» қоры ұсынған «Бренд бук» үлгісі негізінде экологиялық таза құрылыс материалдарымен жабдықталған.
Мұның барлығы біздің ерекше күтімді қажет ететін балаларымыздың денсаулығын жақсарту үшін жасалып отырған игі шаралар» — деді қала әкімі.
Орталық жұмысымен танысқан қонақтар балалардың ата-аналарымен тілдесіп, пікірлерін тыңдады.
Орталық психоневрологиялық ауытқуы бар балаларға жартылай стационарлық жағдайда қызмет көрсетеді. «Қазақстан халқына» қоры мен «Самұрық Қазына» әл-ауқат қорының қолдауымен орталыққа жалпы құны ғимаратты толық жабдықтау үшін 280 млн.теңге инвестиция жұмсалып, қажетті жабдықтар Финляндия, Жапония, Австрия мемлекеттерінен жеткізілген. Қосымша 164, 6 млн.теңге бөлініп, мамандар арнайы оқытылған.
Мұнда балалар үшін проекциялық интерактивті сенсорлық бөлме, сенсорлық интеграциялық бөлмелер, робототехника лего кабинеті, музыка-терапия, арт-терапия бөлмелері мен тігін, ағаш, қыш шеберханалары қарастырылған. Сыйымдылығы 110 балаға лайықталған орталықта қазір 40-қа жуық бала ем алуда.
Қала әкімі Мұрат Әйтенов орталықтың ашылуына арналған жиынға қатысып, сөз сөйледі.
«Бұл қаламыз үшін инновациялық орталық болып табылады. Мақсатымыз – мүмкіндігі шектеулі балаларымызды белсенді өмірге бейімдеп, өздерін қоғамның толыққанды мүшесі екенін сезінуге ықпал ету.
Мамандар әр баланың ауру тарихын ескере отырып, жеке бағдарлама аясында емдеу жүргізеді. Балаларға жағдай жасау, қамқорлық көрсету – азаматтық борышымыз» — деді қала әкімі.
Мұнда нейро-ортопедиялық ауруларға, церебралды сал ауруына шалдыққан балаларға заманауи әдістемелерге негізделген оңалту қызметтері көрсетіледі. Заманауи талапқа сай жабдықталған жаттығу залдары және Механотерапия, Эрготерапия залдары қарастырылған.
Бөлімше оңалтуды қажет ететін балаларды тиісті ем-шаралармен қамту көрсеткішін арттыра отырып, мүгедектікті барынша азайтуға мүмкіндік береді.
