Былтыр елімізде жиһаз өнімдерін өндіру көлемі 4,2 пайызға өсіп, 46,7 млрд теңгені құрады. Саладағы өсім көрсеткіші инвестиция көлемінің артуымен байланысты. Жылдың алғашқы тоғыз айында жиһаз өнеркәсібіне 3 миллиард теңгеден астам инвестиция салынған.
Мемлекеттік қолдауға ие болған өндіріс орындарының бірі — “MEGA SMART” серіктестігі “Тассай” индустриялды аймағында орналасқан. 15 жылдан бері жиһаз шығаратын кәсіпорын нарықта бренд қалыптастырып отыр.
Үйдің сәнін кіргізетін жиһаз шығатын орынға 750 млн теңге инвестиция тартылған. Нәтижесінде 5 шаршы метрден астам өндірістік базаның негізі қаланып, бүгінгі заман талабына сай қажетті құрал-жабдық алынған.
Еуропалық қондырғылармен жабдықталған кәсіпорын 120-ға жуық адамның жұмыспен қамтылуына мүмкіндік беріп отыр. Мұнда жылына 120 түрлі жиһаз шығарылады.
Шымкент жиһаздарына сұраныс артып отырғандықтан, былтыр өндіріс аумағы кеңейтіліп, «Mega Smart B2B» ЖШС іске қосылды. Шеберлер үйге, кеңсеге арналған корпусты және жұмсақ жиһаздарды тапсырыспен әзірлейді.
Айына жүзден аса жиһаз жинағын шығаруға мүмкіндігі бар серіктестіктің бүгінде Астана, Алматы қалаларында да арнайы сауда нүктелері бар.
