Мемлекет басшысы Қасым-Жомарт Тоқаевтың Жарлығымен Мәлік Кеңесбайұлы Мырзалин Қазақстан Республикасының Грузиядағы Төтенше және Өкілетті Елшісі болып тағайындалды. Ол ҚР Президенті Әкімшілігі Басшысының орынбасары лауазымынан босатылды.
Мырзалин Мәлік Кеңесбайұлы — 1971 жылы 31 қазанда Ақтөбеде дүниеге келген.
1996 жылы Мәскеу мемлекеттік халықаралық қатынастар институтын бітірді.
Еңбек жолын 1988 жылы Ақтөбе хром қосылыстары зауытының жөндеу-құрылыс цехының жұмысшысы ретінде бастаған. 1989-1990 жылдары Ақтөбе автожөндеу зауытында зертханашы болып жұмыс істеді.
Өзінің дипломатиялық қызметін 1995 жылы Қазақстанның Ресейдегі Елшілігінің стажеры, референті ретінде бастады, онда бірінші хатшы лауазымына дейін көтерілді.
2004-2007 жылдары Солтүстік Қазақстан облысы әкімі аппаратының басшысы, әкімнің орынбасары, әкімнің бірінші орынбасары болды.
2008-2009 жылдары «Нұр Отан» партиясының Орталық аппараты басшысының орынбасары қызметін атқарды. 2010 жылдың сәуір-мамыр айлары аралығында «Қазақстан темір жолы» ұлттық компаниясы«АҚ президентінің кеңесшісі болып тағайындалды.
2010-2011 жылдары Қазақстан Республикасы Президенті Іс басқармасы аппаратының басшысы болды.
2011-2013 жылдары — ҚР Дін істері агенттігінің Жауапты хатшысы.
2013-2017 жылдары Қазақстан Республикасы Президентінің Іс басқарушысының орынбасары, бірінші орынбасары болды.
2017-2019 жылдары — Ақмола облысының әкімі. Қазақстанның Грузиядағы Елшісі болып тағайындалғанға дейін 2019 жылғы наурыздан бастап Қазақстан Республикасы Президенті Әкімшілігі Басшысының орынбасары болды.
І сыныпты Кеңесші дипломатиялық дәрежеге ие.
Қазақстан Президенті Бауыржан Әлімұлы Мұхаметжановты Грузиядағы Төтенше және Өкілетті Елшісі лауазымынан босатты.
Бүгін сондай-ақ, еліміздің Болгария, Литва және Албаниядағы Елшілері тағайындалды.
ҚазАқпарат
