ҚР Экология,геология және табиғи ресурстар министрі С.Брекешев Шымкентке іс-сапармен келіп, үшінші мегополис жұртшылығымен кездесті. Жүздесу барысында, Министр қоршаған ортаның сапасын жақсарту мәселелерін қозғап, атмосфералық ауа мен су ресурстарының ластануы жайлы баяндама оқыды. Өз кезегінде, қала тұрғындары Шымкенттегі экологиялық ахуал жайлы сауалдарын қойып, өздерін толғандырған мәселелерді қозғады. 
Ел президентінің Жарлығына сәйкес, мемлекеттік органдардың басшылары әр өңірдің халқымен кездесулер өткізіп жатқаны белгілі. Осындай кезекті жүздесулердің бірі ҚР Экология,геология және табиғи ресурстар министрінің қатысумен Үшінші мегополисте өтті. Серікқали Брекешев алдымен еліміздегі экологиялық жағдай жайлы баяндама оқып, атқарылған жұмыстармен бөлісті. Су және орман шаруашылығы мәселелеріне тоқталған министр су ресурстарын басқару жүйесін қайта қарау бойынша жұмыс жүргізіп жатқанын жеткізді. Бұл ретте су заңнамасы мен дипломатияны жетілдіру көзделіп, жаңа су кодексі жобасы әзірленіп жатыр екен. Серікқали Брекешевтің сөзінше, аталған заңнама сәйкес су ресурстары комитетінің және ғылыми ұйымдардың әлеуетін арттыру мен кадрларды даярлау бойынша нақты шаралар жүргізілмек. Ал су шаруашылығы инфрақұрылымын құру, табиғи су объектілерін сақтау мен су тарифтері бойынша мәселелер қайта қарастырылатын болады.
Министрдің айтуынша, Шымкент қаласындағы ірі ластаушы өндірістік орындардың бірі — «ПетроҚазақстанОйл Продактс» ЖШС мұнай өңдеу зауыты болып табылады. Алайда бұл бойынша зауыт ұлттық жоба аясында атмосфераға ластаушы заттар шығарындыларын 2025 жылға дейін 20 пайызға төмендету жолға қойып отыр екен. Бүгінде бұл жөнінде жобалық материалдар келісу сатысында тұрған көрінеді. Кездесу барысында қала тұрғындары жасыл желекке қатысты өз ойларымен бөлісіп, А.Асқаров атындағы дендрологиялық саябақтың мәселесін көтерді. Жиын барысында, қала ішіндегі өзендердің ластануы сөз болды. Тұрғындардың бірі аталған мәселенің түйінін шешу қажет екенін айтып, тез арада тиісті шаралар қабылданбаған жағдайда түрлі эпидемиялогиялық жағдайларға алып келу қауіпі бар екенін атап өтті.
Министрдің өзі атап өткен қаланың ірі ластаушыларының бірі — «ПетроҚазақстанОйл Продактс» ЖШС мұнай өңдеу зауыты тұрғындарға да қолайсыздық туғызуда. Өндірістік орынның іргесінде орналасқан елді-мекен халқы ауыл ішін жағымсыз иіс қаптағанын айтып, Серікқали Брекешевке сауал жолдады. Жалпы қала тазалығын ұстау экологиялық жағдайлардың алдын алу жолындағы басты қағидаттардың бірі екені белгілі. Мемлекет тарапынан тұрмыстық қалдықтарды қайта өңдеуге қатысты тиісті шаралар да қабылданған. Десе де қоқыстарды сұрыптайтын мекемелерде түйіткілде мәселелер әлі де болса жетерлік.
Экологиялық әлеует қозғалған жиында министр барлық жолданған сауал бойынша міндетті түрде мониторинг жүзгізілетінін айтты. Тұрғындардың өтініштері негізінде хаттама толтырылып, мәселелерді шешу жөнінде іс-қимыл жоспары әзірленентінін алға тартты. Әрмен қарай, Түйіткілді мәселесі тарқатылмай жүрген тұрғындар ҚР Экология, геология және табиғи ресурстар министрі Серікқали Брекешевпен жеке тілдесуге мүмкіндік алды. Жалпы жиын қорытындысы бойынша министр үшінші мегополис жұртшылығын талап-тілегін ескеріп, оларды шешу жолында ауқымды жұмыстар жоспарланады деп сөз берді.
