Шымкент қаласы әкімдігінде қоғамдық кеңестің кезекті отырысы өтті. Күн тәртібінде талқыланған мәселе жеткілікті. Отырыста әрбір басқарманың жұмысына кедергі келтіретін факторлар кеңес мүшелерінің назарынан тыс қалмады. Атап айтқанда, автожолдар салуға, қала бюджетін игеруге және сыбайлас жемқорлыққа байланысты басшылардың есептері тыңдалды.
Бауыржан Әлтеев төрағалық ететін жиынның бүгінгі күн тәртібінде шаһардағы 5 өзекті мәселе қаралып, тиісті басқарма басшыларының баяндамалары тыңдалды.
Алдымен, қаржы министрлігі қаржы мониторингі комитетінің Шымкент қаласы бойынша экономикалық тергеп-тексеру департаменті басшысының орынбасары Руслан Данаев мегаполистегі көлеңкелі экономика саласындағы қылмыстарды анықтау бойынша жұмыстарды мәлімдеді.
Айтуынша, жыл басынан бері тергеу өндірісінде 138 қылмыстық іс қозғалса, 91 іс сотқа жолданған. Анықталған 875 млн. теңге залалдың 460 млн. теңгесі өндірілген. Сонымен қатар, шаһарда жедел-профилактикалық іс-шаралар жүргізілуде.
Жиында Шымкент қаласының Жолаушылар көлігі және автомобиль жолдары басқармасы басшысының міндетін атқарушы Мұхтар Қоқанбаев қала тұрғындарын сапалы қоғамдық көлік қызметімен қамту, қаладағы жол құрылысы мәселелерін талқылау, жолаушылар көлігін дамытудың кешенді схемасының орындалуы мен нәтижесі туралы айтып берді.
Кеңес мүшелері аталмыш салаға жауапты басшыға қаламыздағы қоғамдық көліктегі мәдениетті көтеру бойынша өз ұсыныстарын жеткізді. Сондай-ақ, Бүгінде автобуста кездесетін бірқатар проблемаларды сөз етіп, әсіресе, электронды төлем жүйесі мен кондукторларды алып тастау мәселесін көтерді.
Одан өзге, сыбайлас жемқорлық тәуекелдеріне ішкі талдау жүргізу арқылы жемқорлыққа қарсы іс-қимыл бойынша қабылданып жатқан шаралар қаралды.«Агенттіктің тапсырмасы бойынша Департамент жұмысы сыбайлас жемқорлық тәуекелдерінің картасы шеңберінде бағытталған. 9 айда сыбайлас жемқорлық тәуекелдеріне 3 сыртқы талдау және 9 сыбайлас жемқорлыққа қарсы мониторинг жүргізілді. Бүгінгі таңда орындалған ұсынымдардың үлесі 85% және одан жоғары деңгейді құраған көрінеді.
Талдаудың сапасын күшейту мәселелерімен қатар, Департаменттің білім беру, денсаулық сақтау, жер қатынастары салаларындағы сыбайлас жемқорлық тәуекелдерін жою, сондай-ақ полицияның сервистік моделінің жұмысы бойынша ұсыныстары жеткізілді.
