Шымкентте балалардың интелектуалды-шығармашылық қабілетін арттыру мақсатында шара өтті. Ауқымды жиын «Әжемнің ертегісі» жобасы аясында бастау алып, балабақша тәрбиеленушілерінің қойылымымен жалғасын тапты. Оған балдырғандардың ата-аналары қатысып, ақжарма тілектерін жаудырды.
Білім басқармасының №19 «Қызғалдақ» бөбекжай-бақшасы қаламыздағы іргелі бала тәрбиелейтін мекемелердің бірі. Балдырғандар мұнда тек білім алып қана қоймай, әралуан ақыл-ойды жетілдіретін тәсілдерді меңгеруде. Бүгінде аталмыш бақшада «Интеллектиум» кабинеті жұмыс жасайды. Онда қазіргі заман талабына сай соңғы білім беру технологияларына сәйкес, ойындар ойнатылып, жас өрендердің дамуына едәуір жағдай жасалған. Сондай-ақ ұлттық құндылықтарда ұлықталып, ұмыт қалған «Бестемше» ойыны да осы балабақшада қолға алынған. Жан-жақты дамыған тұлға қалыптастыру бақшадан бастау алады, ал бәсекеге қабілетті ұрпақ тәрбиелеу қоғам талабы. Осыны ескерген басшылық жас өрендерге арнап «кітапхана» да жасақтаған.
Көрермен назарына ұсынылған «Әдемі, ақ аю, сұртышқан» ертегісін «Түймедақ» мектеп алды тобының тәрбиеленушілері қойды. Математикалық және интелектуалдық қабілеттерін ашып, өз рөлін мәнерлі әрі дербес машықтандыруға негізделген қойылым жоғары деңгейде өтті. Аталмыш ертегінің авторы Фатима Забурқызының сөзінше бұл шығарманы немересімен бірге ойлап тапқан. Бертін келе тәрбиелік-мәні мен мағынасын ықшамдап, көзі қырағы оқырман қауымына ұсынған.
Рөлдік ойын аяқталған соң Интеллектум кабинетінің жұмысымен таныстық. Мұнда балалар дойбы, марблс» сынды ойындарды тәрбиеші көмегімен меңгеруде. Ал оқуға машықтанып келе жатқан тәрбиеленушілер кітапқа назар аударып, ұстазының сөзін мұқият тыңдауда.
