Асқаровтың аманаттаған бағы 30 түп ағашпен толықты. Тау тұлғаны еске алуға арналған мерекелік шара шаһардың жасыл өкпесі Дендросаябақта жалғасты. Жанға жайлы, дертке дауа саялы мекеннің негізін қалаған қайраткердің есімі осылайша ел жадында қайта жаңғырды. Бірегей тұлға Асанбай Асқаровтың мерейтойына арналған шарада ұлт зиялылары мен жас ұрпақ Дендрологиялық баққа ағаш екті. Саябақ орталығындағы Асқаров еккен ағаштың маңынан Алматыдан келген отбасы мүшелері, ұрпағы, туып-өскен топырағынан келген тараздықтар және Шымкент, Түркістан облысынан көзін көрген азаматтар, ел ағалары 15 түп шынар, 15 арша ағашын отырғызды.
Асанбай Асқорав есімін ұрпақ жадында жаңғырту үшін бүгінде біршама істер атқарылып жатыр. “Асқаровтың ақ қайыңдары”. Тағдырдың талай тақсіретін тартса да адамдық, адалдық қасиетін асқақ ұстап, өмір өзегіне кір шалдырмай кеткен азаматтың ғұмырын бейнелейтін қойылым. Жазушы Шерхан Мұртазамен сұхбаты арқылы Кеңес заманындағы қазақтың бастан кешкенін, айта алмаған ащы шындықты бүкпесіз жайып салған спектакль көрерменді тебірентпей қоймады. Басты рөлді сомдаған мәдениет қайраткері Еркінбек Шымырқұлов тау тұлғаның тауқыметті тағдырын сомдау қиын әрі жауапкершілігі жоғары дейді.
Асанбай Асқаров есімі — шымкенттіктер үшін ғана емес, күллі қазақ халқы үшін алтын әріппен жазылған есім. Тау тұлғаның өмір жолы мен жасаған еңбегі ұлт жадында мәңгі сақталмақ.
