Сенаторлар Шымкент қаласына арнайы жұмыс сапармен келіп, алдымен көшпелі отырыс өткізді. Жиын барысында қылмыстық іс жүргізу заңнамасын одан әрі жетілдіру, азаматтардың құқығын қорғау, проблемалық мәселелер талқыға түсіп және оларды шешу жолдары айтылды. Жиында Бас прокуратура, Сыбайлас жемқорлыққа қарсы іс-қимыл агенттігі, Ішкі істер министрлігі өкілдері және басқарма басшылары мен аудан әкімдерінің қатысуымен, қылмыстық процестің үш буынды моделі жағдайында жаңа форматтағы кадрларды даярлау бағыттары жөнінде келелі әңгімелер қозғалды. Сондай-ақ, заңнаманы жетілдіру мәселелері еліміздің азаматтарының конституциялық құқықтарына тікелей қатысты екені айтылды. Комитет төрағасы Владимир Волков басқа да ауыр қылмыстар үшін жауапкершілікті қатаңдатуға бағытталған заңдар қабылданғанын жеткізіп, ендігі ретте жергілікті мәслихаттар Сенатпен бірлесе тығыз байланыста жұмыс істеуі керек дейді.
Қазіргі таңда Шымкент қала әкімдігі құқық қорғау органдарымен бірлесе азаматтардың лайықты өмір сүруі үшін тиісті жұмыстарды қолға алған. Шаһар басшылығы бұл көшпелі отырысты мегаполисте өткізудің маңыздылығын айтып, қатысушылар талқылау мәжілісі нәтижелі болатынына сенім білдірді.
Кездесуде Ішкі істер министрлігінің, Сыбайлас жемқорлыққа қарсы іс-қимыл агенттігінің, Шымкент қаласы сотының қылмыстық істер жөніндегі сот алқасының өкілдері де баяндама жасады. Еліміздің Бас прокурорының орынбасары қылмыстық заңнаманы оңтайландыру бөлігінде жүргізген жұмысының қорытындылары және қылмыстық-процестік және қылмыстық-атқару кодекстерін бір мезгілде түзете отырып, қылмыстық заңнаманы оңтайландыру мәселелері бойынша әзірленген заң жобасы туралы да айтып өтті.
