КӘСІПОДАҚ КҮНІ АТАЛЫП ӨТТІ

   Осыдан үш жыл бұрын елімізде жаңа мереке пайда болды. Бұл Қазақстан Республикасы үкіметінің қаулысымен бекітілген, 10 қазан — Қазақстан кәсіподақтары күні.Кәсіби мейрам қарсаңында қаламыздың бірқатар кәсіподақ ұйымдарына алғыс хаттар мен төсбелгілер табысталды.

  Кәсіподақ әрқашан жұмыс істейтін халықтың еңбек және әлеуметтік-эконмикалық аспектілерін қорғайтын ұйым.Қызметкерлердің мүдделерін қорғау, құқықтарының сақталуын қоғамдық түрде бақылау, еңбек қауіпсіздігі және жанжалдарды шешу — бұл ұйымның басты міндеті.Бүгінде мегаполисімізде 8 салалық 7 жергілікті кәсіподақ ұйымдары жұмыс істеуде.

  Кәсіподақ — еңбек адамының құқығын қорғау, оның лайықты тұрмыс сапасы мен жұмыс жағдайын қамтамасыз ету жолында мәртебелі миссия атқаратын аса маңызды заманауи қоғамдық институттың бірі.Түрлі кәсіппен айналысатын еңбек азаматтарының құқығының қорғалуында елеулі еңбек етіп, 40 жылдан бері кәсіподақ мүшесі болған Серік Әуесхановтың асығы алшасынан түсті. Ол былтыр 11 бастауыш кәсіподақ ұйымын ашып, 924 азаматты кәсіподақ мүшелігіне тартқан.Күні бүгінге дейін қос қызметті тізгіндеген азамат «кәсіподақтағы белсенділігі үшін» медальімен марапатталып, халық қошеметіне бөленді.