ҚАЙТА ЖАҢҒЫРҒАН БІЛІМ ҰЯЛАРЫ

Шымкентте өткен ғасырда қабырғасы қаланған ескі мектептер күрделі жөндеуден өтуде. Соның бірі – А.Байтұрсынов атындағы №50 мектеп-гимназиясы. Құрылыс жұмыстарын көруге арнайы барған шаһар басшысы жауапты тұлғаларға тапсырылған істің сапалы орындалуын талап етті.

Қазіргі таңда А.Байтұрсынов атындағы №50 мектеп-гимназиясының ішкі бөлмелері сыланып, есік, терезе, электр жүйелері жаңартылуда. Алғашқы әскери дайындық, робототехника, биология, химия, физика кабинеттері де заман талабына сай жабдықталған. Цифрлық талаптарға сай қосымша су жаңа 500-ноутбук, 150 компьютер, 100 планшет сатып алынды.

Ғимаратты аралау барысында жұмыстың жүйелі, жоспарға сәйкес жүргізіліп жатқандығы белгілі болды.  «Құрылысты мерзімінде тапсыруға асығамыз деп, сапаны естен шығармайық»-деген қала әкімі Мұрат Әйтенов тиісті сала басшыларына құрылыс қарқынын жіті бақылауды тапсырды.

Мұнда күрделі жөндеу жұмыстарының 65%-ы біткен. Ендігі кезекте «отмостка» құю, сыртқы қоршауды салу, көгалдандыру сынды шаруалар атқарылуы тиіс.

Жөндеуден өтіп, қайта жаңғырып жатқан білім ошағының ішінде Сайрам тұрғын алабындағы Ю. Сареми атындағы №107 мектеп-лицейі де бар. Күрделі жөндеуден өтіп жатқан мектепті шаһар басшысы М.Әйтенов арнайы барып тексерді.

2000 орынға арналған мектеп 3 қабаттан тұрады. Бұл білім ошағының жылу жүйесі 11 жыл бұрын ауыстырылса, шатыры мен бірнеше есік-терезесінің қойылғанына 8 жыл болған. Биыл ғимараттың тозығы жеткен тұстары бүтінделіп, шатырының 955 м2 ауысты, электр жүйелері 100%-ға жаңарды. Информатика, физика, химия, биология, логопед кабинеттері заман талабына сай жаңғырып, 2 интерактивті тақта, 350 ноутбук, 130 компьютер, 200 планшет, 8 панель сатып алынды.

Ғимарат құрылысын тексеру барысында бірнеше кемшіліктер де байқалды. Мұрат Дүйсенбекұлы ол мәселеге  ескерту жасап,  -тексеруші топпен істің 100% сапалы орындалуын келіп, қайта көретін боламыз,-деді.  Аталған  кем-кетік жойылғаннан кейін мектеп оқушыларға есігін ашпақ.      Жалпы білім ошағы жаңа оқу жылына 90%-ға дайын. Қазіргі таңда аяқ жолдар төселіп, асфальттау жұмыстары жүруде.

Жөндеу жұмыстарынан өтіп жатқан мектептер тізімінде осы кезге дейін мүлдем күрделі жөндеу көрмеген  А.Навои атындағы №11 жалпы орта мектебі бар. Қала әкімі бұл оқу ұясына да табан тіреп, шатырынан бастап, есік, терезе, еденіне дейін толық жаңартылып жатқан нысанмен танысты. Мұнда жылу жүйелері 100%-ға ауыстырылған. Сондай-ақ, жаңа қоршау салынды. Арнайы  химия, физика, биология, информатика сынды сынып кабинеттері мен  зерттеу-лабороториялық кабинеттері қосылды. 250 ноутбук, 100 компьютер, 10 панель сатып алынды.

-Мұның барлығы үлкен жұмыс және жауапкершілік. Жаңа оқу жылы қарсаңында оқушылар жаңа ғимаратқа көшкендей әсерде болады деп ойлаймын. Қандай да ақау шықса, жауапты мердігер мекеме жіберген қателіктерін 5 жыл ішінде қайта түзеп беруі тиіс. Осы жағын дұрыстап қадағалаңыздар,-деді әкім.

Әзірге жұмыстың 85% орындалған. Күрделі жөндеу қыркүйекке дейін толық аяқталмақ.