Ұлт ұстазы Ахмет Байтұрсынұлының туғанына биыл 150 жыл толып отыр. Рухани көсемнің атында Шымкентте мектеп, көше атауы бар. Қаланың арғы шеті мен бергі шетін байланыстырып тұрған А.Байтұрсынұлы көшесінің басында алаш ардақтысына арналған ескерткіш те орнатылған. Туған күніне орай ескерткіш алдында Шымкентте ұлы тұлғаның 150 жылдығына орай «40 мысал, 40 мақал» атты көшпелі әдеби тіл керуені өтті. Оған қала әкімі М.Әйтенов және зиялы қауым өкілдері мен қала тұрғындары қатысты.
Сөз алған қала әкімі Мұрат Әйтенов қайраткердің қайсарлығы мен ұлтжандылығы кейінгі ұрпаққа үлгі-өнеге екендігін атап өтті.
— Қазақ даласына терең біліммен қатар, саяси еркіндік қажет екенін терең түсінген ұлт ұстазы мемлекетшіл қайраткерге айналды. Алаш ардақтылары ұмтылған, бірақ көре алмай кеткен тәуелсіздікті көру, іргесін нығайту осы тұрған буынның маңдайына жазылған екен. Егемендігіміз баянды, елім деген ерлеріміздің еңсесі биік болсын!- деді, қала басшысы.
Ахмет Байтұрсынұлы — ақын, лингвист, әдебиетші, түркітанушы, публицист, педагог, аудармашы, мемлекет қайраткері, қазақ тіл білімі мен әдебиеттану ғылымдарының негізін салушы, ұлттық жазудың реформаторы, араб графикасының негізінде қазақтың төл әліпбиін түзіп, төте жазудың көмегімен «Қазақ» газетін ұйымдастырды, ұлттық журналистиканы дамытқан ұлы тұлға.
Өз кезегінде сөз алған басқа да зиялы қауым өкілдері де Ахмет Байтұрсынұлының қайраткерлігіне, шығармашылығына тоқталып, оның елі үшін еткен еңбегін жас ұрпаққа үлгі ету жолында насихат жұмыстарын жалғатыра беру керектігін жеткізді.
Іс-шара барысында ақынның өлеңдері оқылып, қазақ композиторларының әндері шырқалды. Ескерткішіне гүл шоқтары қойылды.
Айта кету керек, Қазақстан халқы тілдері мерекесі 1998 жылы 22 қыркүйек деп бекітілсе, 2017 жылдан бері Алаш ардақтысының, тіл білімінің негізін қалаушы Ахмет Байтұрсынұлының туған күніне орайластырып 5 қыркүйекке ауыстырылған болатын.
