ЖАҢА МЕКТЕП АШЫЛДЫ

Шымкентте тағы бір жаңа мектеп пайдалануға берілді. Сыйымдылығы 500 орындықты құрайтын білім ордасының ерекшелігі- балалар Сингапурлық білім беру жүйесімен оқытылмақ. Сондай-ақ, оқушының таңдауына қарай 4 бірдей тіл қосымша сабақ ретінде енгізіліп отыр. 3-ші мегополисте бой көтерген бұл  білім ордасында  бастауыш сынып оқушыларының еркін форматта білім алуына қолайлы жағдай жасалған. Мұнда шахмат сыныбы, қосымша үйірмелер мен түрлі бағытта сабақ өтетін арнайы кабинеттер,психологиялық дәріс беретін бөлмелер толық жаңа технологиялармен жабдықталып отыр. Сондай-ақ, оқушылардың терең білім алуына қажетті деп табылған озық үлгідегі ноудбуктер де қарастырылған. Мектептің ішкі жай күйімен танысуға қала әкімінің орынбасары мен білім басқармасының басшысы арнайы келіп,салтанатты түрде тұсауын кесті.

«New Line School» атауы берілген білім беру мекемесінде балалар сингапурлық білім жүйесімен оқытылмақ. Жоспар бойынша, Бастауыш сынып оқушыларының саны бір сыныпта 14-15тен аспайды. Сондай-ақ олар өз таңдауларына қарай музыкалық білім  және қосымша 3 тілде яғни, ағылшын, кәріс, итальян тілдерін меңгеруге мүмкіндік алады. Одан бөлек,қосымша шығармашылық пен спорттық үйірмелерде де өздерін шыңдау үшін жағдай жасалып отыр. Ал  мектепте жалпы саны 30-ға жуық білікті ұстаз сабақ береді деп күтілуде.

Айта кетейік, биыл Шымкентте жеке инвесторлар есебінен 26 мектеп ашылған. Осыған байланысты жаңа оқу жылында 28 мыңға жуық бала 1-ші сыныпқа барады. Бұл өткен жылмен салыстырғанда 3 мың балаға артық болып отыр. Бұл ретте жеке кәсіпкерлердің қолдауымен ашылған білім беру мекемелері үш ауысыммен оқитын мектептердің мәселесін шешуге оң ықпал етуде.