Қала әкімі Мұрат Әйтенов мегаполистегі жол құрылыс жұмыстарының барысын тексерді. Қала басшысының алғашқы бағыты — Бәйдібек би даңғылы мен Арғынбеков көшесінің қиылысы. Мамандардың сөзінше, Бәйдібек би даңғылы мен Арғынбеков көшесінің қиылысындағы 3 деңгейлі жолайрық құрылысы 2022-2023 жылдар аралығында қаланың көлік қозғалысын реттеудің кешенді жоспарына сәйкес жүзеге асуда. Жоспар бойынша аталған көшелердің көлік өткізгіштік деңгейі екі есеге артуы тиіс. Жолайрықтың техникалық сипатына орай Бәйдібек би даңғылында 700 метр, Арғынбеков көшесінде 921 метр көше аралығы құрылыс аумағына еніп отыр. Алдағы уақытта белгіленген нысанға ені 80 метрлі төрт-алты жолақты автомагистраль салынып, жол жиегіне жаяу жүргіншілер және веложол төселмек.
Осыған дейін хабарлағанымыздай, құрылыс жұмыстары жүргізіліп жатқан Бәйдібек би көшесінде көлік қозғалысы 6 шілде күні жабылған болатын. Жоспарға сәйкес, ағымдағы жылдың 1 қыркүйегінде Бәйдібек би даңғылы бойымен солтүстік бағытта көлік қозғалысы жартылай ашылуы күтілуде. Оңтүстік бағытта көлік ағыны Арғынбеков көшесінен бұрылып Байтұрсынов көшесіне қарай өтеді. Қаламыздың жүргізушілері үшін Арғынбеков көшесіне альтернативті магистралдар ретінде Рысқұлов және Төлеметов көшелері белгіленген. Ал, Бәйдібек би даңғылына альтернативті көше ретінде Бәйтереков, Шаяхметов және Өтегенов көшелері көрсетілген. 2022 жылдың соңында аяқталатын Қонаев көшесі мен Рысқұлов көшесінің қиылысындағы жолайрық құрылысы да белгіленген кестеге сай жүзеге асуда.
Сондай-ақ, қала әкімі Мұрат Әйтенов тұрғындардың қозғалысы үшін басты көшелердің бірі атанған Қонаев даңғылындағы құрылыс жұмыстарының барысын да жіті тексеріп қайтты. Д.Қонаев даңғылының 5 кезеңіндегі құрылыс жұмыстары Бадам өзенінен бастап Д.Қонаев даңғылы жалғысының 6 кезеңіне дейін аралықты қамтып отыр. Құрылыс қолданыстағы жобасы бойынша Д.Қонаев даңғылы 5 кезеңінің ұзындығы 4,6 шақырым, жолдың ені 23 метрді құрайды. Жолдағы салынып жатқан аяқжолдың ені 3 метр және 6 қозғалыс жолағы бар. 5 кезеңнің жұмыс шеңберінде бүгінде жол негізін әзірлеу, тас төсеу, суағарларды орнату, су өткізгіш құбырын орнату жұмыстары жүргізілуде. Сонымен қатар, құрылыс белдеуіндегі инженерлік желілерін ауыстыру жұмыстары да жоспарланған. Қазіргі уақытта Д.Қонаев даңғылында атқарылып жатқан ауқымды жұмыстардың бірі — тірек қабырғаларын орнату. Оның ұзындығы оң жағынан 1620 метрді құрайды. Сол жағынан 1689 метр. Биіктігі 0,6 метрден 14,25 метрге дейін.
Қаладағы шығыс айналма жолы құрылысы қарқын алған. Бүгінде айналма жолдың құрылыс жұмыстары қарқынды. Нысанның құрылысы 2021 жылы басталған. 1-кезеңі №1 автожолынан Әл-Фараби көшесіне дейінгі аралықты қамтиды. Айналма жолдың ұзындығы — 3,9 шақырым, 4 жолақты және ені — 60 метр. Қазіргі таңда құрылыс жұмыстарының 28% орындалды.
Шаһар басшысы жұмыстардың межеленген мерзімде және жоғары сапада орындалуын тапсырды.
Сондай-ақ, шаһардың шақырым жолына асфальт төселді. Қала әкімі М.Әйтенов Базарқақпа тұрғын алабына барып, жөндеуден өткен жолдардың сапасын тексерді.
