Соңғы екі жылда әлемге қауіп төндірген нағыз сынақта сыналса да сағы сынбай, керісінше, өздерін шыңдаған дәрігерлердің еңбегі елеуге тұрарлық. Осы мақсатта мегаполистің медицина саласының өркендеуіне үлес қосып жүрген жандардың төл мерекесі атап өтілді. Денсаулық сақтау ісіне үлес қосқан ақ халаттылар марапатталып, қажырлы қызметтеріне құрмет көрсетілді.
Денсаулық сақтау қызметкерлерінің кәсіби мерекесі эпидемиологиялық жағдайға байланысты екі жыл бойы кең көлемде аталмаған болатын. Әлемді қатерге салған дерттің беті қайтып, биыл дәрігерлердің төл мерекесі тойланды. Опера және балет театрындағы салтанатты шарада бас қосқан ақ халаттыларға қала әкімінің бірінші орынбасары Шыңғыс Мұқан алғыс білдіріп, жемісті жетістіктеріне тоқталды.
Тұрғындармен тұрақты, халықпен тығыз байланыста қызмет жасап жүрген денсаулық сақтау саласы қызметкерлерінің кәсіби мерекесімен мегаполистің мәслихат хатшысы Бахадыр Нарымбетов те құттықтады.
Салтанатты жиында денсаулық сақтау саласында қызмет етіп жүрген медицина мамандарына «Еңбек ардагері», «Денсаулық сақтау ісіне қосқан үлесі үшін», Денсаулық сақтау министрлігінің «Құрмет грамотасы» және қала әкімінің «Алғыс хаты» табысталды.
Қаланың бас дәрігері Нұрлыбек Асылбеков
соңғы жылдары медицина саласында жеткен жетістіктерді саралады.
Жауапты қызметтен жалтармай, жанын сала еңбек етіп келе жатқан маман иелері, қызметтеріңіздің биігінен көрініп, мерейлеріңіз үстем бола берсін!