85 жылдық тарихы бар оңтүстіктегі іргелі оқу ордасында республикалық жұмыс берушілер форумы өтті. Басты мақсат «Ұстаздар ұстаханасы» атанған Оңтүстік Қазақстан мемлекеттік педагогикалық университетінің түлектерін тұрақты жұмыспен қамту болып табылады. Яғни, білім ұясы болашақ мамандарды дайындап қана қоймай, оларды жұмыспен қамтуға дейін атсалысады. Форумның ең маңызды көрінісі әрі оқу жылының жемісі ретінде 2022 жылғы 20 түлекке республикамыздың әр аймағы бойынша жұмысқа орналасу үшін арнайы жолдама берілді.
Республикамызға білікті педагог мамандар дайындап шығаратын оңтүстік өңіріндегі тұңғыш жоғарғы оқу орны – Оңтүстік Қазақстан мемлекеттік педагогикалық университетінде 2022 жылғы бітіруші түлектерді жұмысқа бөлу мақсатында «БОС ОРЫНДАР ЖӘРМЕҢКЕСІ – 2022» Республикалық жұмыс берушілер форумы өтті. Биыл аталмыш білім ұясында 6 факультеттен 1,5 мың студент түлеп ұшпақ. Оқу ордасының Ректоры Гүлжан Сүгірбаеваның айтуынша, Семей, Орал, Алматы облысы сынды мұғалімдер тапшы аймақтардан университет түлектеріне сұраныс көптеп түсуде. Сонымен қатар, Шымкент қаласының өзінен 700-ге жуық бос жұмыс орындарына сұраныс келіп түскен.
Бүгінгі форумға 160-тан астам жұмыс беруші келді. Түлектердің портфолиоларымен жіті танысып, бос жұмыс орындарымен таныстырды. Сонымен қатар, Түркістан облыстық адами әлеуетті дамыту басқармасы басшысының орынбасары Ардақ Садықованың айтуынша, педагогикалық кадрлардың жұмысқа орналасуы өте қиын. Мұндай жәрмеңкелер жас мамандарға үлкен мүмкіндік әрі жұмыс берушілер үшін тиімді орта. Қазіргі таңда облыс шеңберінде 240 маман тапшылығы бар. Олардың қатарында физика-математика, дефектология, орыс тілі мамандары көш бастап тұр. Бүгінгі республикалық форум нәтижесінде 10 түлек ауылға қарай жол тартып, еңбек жолын бастамақ.
Оксана Татюшкина білім ошағының физика-математика факультеті математика мамандығының 4 курс студенті. Қазақ тілін жетік меңгерген Оксана оқу барысындағы тәжірибелік жұмыстарын Алматы қаласы, Әуезов ауданында ауданында орналасқан №126 мамандандырылған лицейінде атқарған екен. Енді биыл оқуын тәмамдап, комиссия шешімінің негізінде Алматы қаласына жұмысқа жіберілді.
Форумға Түркістан облысы және Шымкент қаласындағы 130-ға тарта білім беру мекемелерінен 160 жұмыс беруші кадр бөлімінің мамандарымен бірге келіп, іс-шараға портфолиомен келген оқу одасының түлектеріне жұмысқа қабылдауға ұсыныстар жасады. Айта кетейік, 2022 жылы ОҚМПУ-ды 1516 түлек бітіріп шығатын болса, университет түлектеріне республикамыздың білім беру мекемелерінен 3573 сұраныс ресми түрде келіп түсіп, тіркелді. Бұл сұраныс ОҚМПУ түлектерінің біліміне деген жоғары көзқарасты танытады
