Елдімекен тұрғындары кездесуде алдымен Мемлекет басшысы Қасым-Жомарт Кемелұлы Тоқаевтың халыққа арнаған жолдауын жылы қабылдағанын жеткізіп, елдің әлеуметтік экономикалық, саяси саласында оң өзгерістер орын алатынына сенім білдірді. Сенаторлар Парламент алдында Жолдаудан туындайтын міндеттер мен алдағы жоспарларды талқылады.
«Асар-2» шағынауданында 12 мыңға жуық халық тұрады. Қалаға жаңадан қосылған елдімекен инфрақұрылым жүйелерімен толық қамтамасыз етілмеген. Сенаторлар елдімекендегі халықтың мұң-мұқтажын тыңдап, инфрақұрылымдық мәселелеріне қатысты туындаған сауалдарын тыңдап,құзырлы органдардың өкілдеріне тапсырма берді.
Кездесу кезінде Сенатор Н. Бекназаров – Мемлекет басшысының жолдауында айтылғандай «Қуатты өңірлер – қуатты ел» деген ұстаным әрдайым өзекті екенін баса айтып, осы тұрғыда халықтың қалауы ескеріліп, өңірлерде халық игілігі үшін жасалып жатқан жағдайлар аз еместігіне тоқталды. Сенатор А.Қапбарова Президенттің Жолдауы барлық салаға жаңа серпінмен жұмыс істеу міндеттерін жүктеп отырғанына тоқталды.
«Асар-2» шағынауданында ауыз су, табиғи газ, жол, кәріз жүйесі мәселелері толыққанды шешілмеген. Қазіргі таңда, ауыз су мәселесін шешу үшін кезекті бюджеттік нақтылауға құрылыс жұмыстарын жүргізуге бюджетке қаржы бөлуге ұсыныс берілген. Құрылыс жұмыстары биыл басталады. Шымкент қаласы аумағында табиғи газ қысымының жетіспеушілігіне байланысты АГТС-3 құрылыс жұмыстары жүргізілуде. Құрылыс жұмыстары ағымдағы жылдың соңында аяқталуы жоспарлануда. Тұрғындар сенаторларға үй ішіне дейін газ құбырын тарту құны тым жоғары екеніне шағымданды. Халықтың талап тілектерін тыңдаған Сенат депутаттары газ құбырын тарту ісімен айналысатын компаниялардың қызмет көрсету тарифтеріне сараптама мен бақылау жүргізу керектігін ескертті.
