БОКСТАН ЖЕРЛЕСТЕРІМІЗ ОЛЖАЛЫ ОРАЛДЫ

Иорданияның Амман қаласында сары құрлық елдерінің ең мықты деген жұдырықты жас боксшылары бас қосты. Азия чемпионатының жекпе-жегінде жастар мен жасөспірімдер, қыздар арасында кезекті Азия чемпмонатының жеңіпаздары анықталды. Тартысқа толы өткен Азия чемпионатында Түркістан облысының боксшылары 3 алтын, 3 күміс және 1 қола медальді еншілеп қайтты.
Қазақстан ұлттық құрамасының намысын қорғаған жас боксшылар бұл додада жасындай жарқылдады.Түркістан облысының талантты боксшысы 57 келі салмақта сынға түскен Төрехан Сабырхан жасөспірімдер арасында қарсыластарын тізе бүктіріп, жеңімпаз атанды. Азия чемпионатында талайларды талантымен таң қалдырған жерлесіміз 63 келі салмақта бағы жанған Ахмет Үсен те жасөспірім боксшылардың ішінде алтын медалді қанжығасына байлады. Ал, бұдан өзге 57 келі салмақта жұдырықтасқан Бахтияр Анарбаев жастар арасында қола жүлдеге ие болды.

Еліміздің мерейін асырып, атақ-даңқын шығарып қайтқан қазақстандық бұрымды жас боксшыларымыз да жарады. Бəрінен де елдің мүлдесін жоғары қоятын бокстан Қазақстанның жасөспірімдер командасын баптайтын мамандар бұл дүбірлі додаға жоғары деңгейде дайындықпен барыпты. Нəтижесі де жаман емес. Ел қоржынына алтын салған қыздар арасында 57 келі салмақтағы жерлесіміз Ұлжан Сəрсенбек жеңістің тұғырының ең биік сатысынан көрінсе, түркістандық Гаухар Шайбекова мен Айда Сарибарова жастар арасында күміс жүлдегер атанды. Жасөспірім бұрымдылар арасында 75 келіде бақ сынаған Шұғыла Нəлібай қола алқаны қанағат етті.

Сары құрлық елдері бойынша өткен бокс бәсекесіне 21 мемлекеттен жас былғары қолғап шеберлері қатысып, мықтыларын танытты. Тартысты өткен жарыста Түркістан облысының 7 бірдей спортшысы жүлдеге ие болып отыр. Бұл-облыс спортының тарихы үшін үлкен жетістік. Айта өтерлігі, білікті басшы Сейтжан Жанысбаев басшылық жасайтын Түркістан облыстық №5 олимпиада резервінің мамандандырылған балалар мен жасөспірімдер спорт мектебінен 4 спортшы қатысып, биік белестерді бағындырып, туған елге олжалы оралды. Сонымен қатар, облыстық №4 олимпиадалық спорт мектебінің шәкірті Ұлжан Сәрсенбек те жерлестеріне зор қуаныш сыйлады. Жеңімпаз болып келген спортшыларды Шымкент теміржол вокзалынан аталған спорт мектептерінің ұжымдары мен ата-аналары және жанкүйерлері күтіп алып, сый-құрмет көрсетті.