Ұлы Отан соғысының ардагері, еңбек ері, болмысы берен, кеудесі кенен – Кенжебек Есмұрзаевтың бюсті ашылды. Қанды қырғында алдыңғы шепте шайқасып, елге жеңіспен оралған азаматтың білім жолында еселі еңбек еткені де ел есінде. Майдангердің ұл-қыздары Шымкент қаласындағы Хәкім Абай мұражайында әке рухына тағзым етіп, ескерткіштің салтанатты ашылу рәсімін өткізді.
Ұлы Отан соғысы кезінде Төлеби ауданы, Ұзынарық ауылынан 68-ге жуық сазбаз Отан қорғау үшін қолына қару алып, майдан шебіне аттанған. Олардың қатарында Есмұрза әулетінен 4 бірдей бауыр да бар.
Кенжебек Есмұрзаев 1924 жылы тамыз айының 18 жұлдызында Төлеби ауданы, Ұзынарық ауылындағы қарапайым отбасында дүниеге келген. Шаңырақтың сүт кенжесі 1942 жылы әскер қатарына шақыру алады. 18 жасар Кенжебек Емұрзаев буыны қатпаған жас жігіт болса да, өмір мен өлім арасындағы отты майданда ерлік көрсетіп, тарихта қайталанбас қолтаңбасын қалдырды. Оның майдангерлік жорығы Смоленск, Калининград шебінен басталып, Киев және Харьковты азат етуге атсалысқан.
Биыл еңбек ерінің торқалы 90 жылдығы. Елге оралған соң ол отау құрып, 11 перзент сүйеді. Төлеби ауданының білім саласын дамытуда қажырлы еңбек еткен арда азамат қызмет жолында талай шәкірт тәрбиелеп, білім шыңына жетелегені бүгінде ел арасында аңыз болып айтылып келеді. Дала төсінің ері Отанға деген ыстық сезімін ұстаздық ұлағатымен ұштастырып, ұлтымызда өркен жайған әдебиет пен мәдениеттің көркеюіне үлкен үлес қосты.
«Ұстаз – шәкірт жанының бағбаны, өз ісінің берілген ұстасы. Оның еңбегі шөлге құдық қазғанмен тең» -, деп айтып жатады. Кенжебек Есмұрзаұлының шәкірттері бүгінде Қазақстанның түкпір-түкпірінде. Бүгінгі тағылымды шараға майдан батыры әрі ұлағатты ұстаздың алыс-жақындары, көзін көргендер мен шәкірттері қатысып, біртуар азаматтың өнегелі өмір жолынан сыр шертті.
