1-3 қазан аралығында Ресей астанасы Мәскеуде каратэден Karate 1 Premier League турнирі өтті. Бұл халықаралық жарыста Қазақстан құрамасы кумите санатында үш алтын, бір күміс медаль жеңіп алды.
Токио Олимпиадасында 61 килодан жоғары салмақта қола медаль алған Софья Берульцева Мәскеуде 68 килодан жоғары салмақта чемпион атанды. Софья ақтық сында ресейлік Вера Ковалеваны жеңді. Қазақстандық татами шебері осымен төртінші рет Karate 1 Premier League бәсекесінде алтын медаль алды. Ол осыған дейін Шанхай мен Мадридте (2019 жыл), Стамбулда (2021) өткен Премьер-лигада топ жарған.
Токио Олимпиадасына қатысқан тағы бір каратэшіміз Мөлдір Жаңбырбай (50 кг) финалда австриялық Беттина Планкты жеңіп, Мәскеудегі жарыстың чемпионы атанды. Бұл Мөлдірдің Премьер-лига жарыстарындағы алғашқы алтыны. Ол биыл Лиссабонда өткен (Португалия) Премьер-лигада күміс жүлдегер атанған.
Сабина Захарова (55 кг) финалда тағы бір ресейлік Анна Чернышеваға есе жіберіп, күміске қол жеткізді.
Ал ерлер арасында 60 килода финалға шыққан Қайсар Алпысбай ресейлік Евгений Плахутинді тізе бүктіріп, жеңімпаз атанды. Қазақстандық каратэші былтыр Чили астанасы Сантьягодағы премьер-лигада топ жарған.
Айта кетейік, Karate 1 Premier League — WKF (Әлемдік каратэ федерациясы) ұйымдастыратын деңгейі жағынан әлем чемпионатынан кейінгі екінші жарыс. Әлемдік каратэ федерациясы жыл сайын Премьер-лиганың төрт-бес кезеңін өткізеді. Биыл барлығы төрт кезең өтті. Енді каратэшілер 16-21 қараша аралығында Дубайда өтетін Әлем чемпионатына қатысады.
Каратэ биыл Токиода алғаш рет Олимпиадасының бағдарламасына қосылды. Қазақстан бұл спорт түрінен қос қолаға ие болды (Софья Берульцева мен Дархан Асаділов). ХОК (Халықаралық олимпиада комитеті) шешімімен каратэ 2024 жылы Парижде өтетін Олимпиада бағдарламасына қосылған жоқ.
