Қазақстанның еңбек сіңірген қайраткері, атақты мүсінші, «Өнер ордасы музейі» ЖК –нің директоры Тілеуберді Бинашевқа Түркістан облысының «Құрметті азаматы» атағы тапсырылды, — деп хабарлайды aigak.kz тілшісі. Бұл мәртебелі марапатты Түркістан облысы әкімінің орынбасары Сәкен Қалқаманов табыстаған.
Тілеуберді Бинашев Арыс қаласына қарасты Байырқұм ауылында дүниеге келген. Бала кезінен мүсін өнеріне қызығып, ағаш жонып, тастарды қашап, мүсінмен әуестенген. Халқымыздың басынан кешкен түрлі оқиғаларға байланысты композициялық монументтер жасаған. Жасаған дүниелерінің ішінде Абылай хан, Кейкі батыр, Қарасай батыр, Шақшақ Жәнібек, Төле би, Қаз дауысты Қазыбек би, Әйтеке би, Қажымұқан, Бауыржан Момышұлы, Шәмші Қалдаяқов, Дінмұхаммед Қонаев, Талғат Бигелдинов, Мәншүк Мәметова сияқты тарихи тұлғалар мен қоғам, әдебиет, мәдениет қайраткерлерінің мүсінін жасаған. Шаңырағын шағын мұражай-көрмеге айналдырған. Мүсіншінің еңбектері бірнеше республикалық, бүкілодақтық және халықаралық көрмелерге қатысқан.
Арыс қаласындағы орталық алаңда эпостық жырға сүйенген, сәтті бейнеленген «Мұңлық-Зарлық» символикалық ескерткішін тұрғызды. Туған жерінде Алатау батыр ескерткіші орнатылған.
Түркістан қаласы оқушылар сарайының алдында Абай, Түркістан қалалық музыкалық драма театрдың алдында Әл-Фараби және «Ақжайық» музыка мектебінің алдында Шәмші Қалқаяқовтың ескерткіштері қойылды. Тәуелсіздік күні қарсаңында Түркістанда жаңа әкімшілік-іскерлік орталығының алдында ҚР Тұңғыш Президенті – Елбасы Нұрсұлтан Назарбаевқа биіктігі – 4 метр, тұтастай қоладан құйылған ескерткіші орнатылды.
«Мұңлық-Зарлық», «Керей-Жәнібек», «Баба рухы» монументтері, Қажымұқан, Абылайхан, Құрманғазы, Күләш Байсейтова ескерткіштері Т.Бинашевтің өнердегі эпикалық кең құлашын көрсетеді. Лирикалық лебі бар «Атамекен», «Әуен», «Сырласу», «Байырқұмның баласы», «Көктемгі жаңбыр», «Сүйінші» «Қиял» «Бинаш ата», «Аршагүл ана», «Байырқұмның қыздары», «Кемпірқосақ», «Дала қызы», «Сыр бойы» «Сағыныш» және т.б. туындылары туралы көп сөз айтуға болады.
Марапаттары : ҚР Мәдениет Министрлігінің «Мәдениет қайраткері», «Алпамыс батыр» медалі, Ордабасы ауданының «Құрметті азаматы», ҚҚ «ҚР Көркем Академиясының Академигі, Арыс қаласының «Құрметті Азаматы», «Талғат Бигельдинов» атындағы медалі, «Сағадат Нұрмаханбетов» атындағы медалі, «Облысқа сіңірген еңбегі үшін» медалі, «Алтын адам» сыйлығының мүсіншісі.
Айта кетейік, бүгін Алматы қаласында мүсіншінің «DALA DAUYSY» атты шығармашылық көрмесі өтіп жатыр. Салтанатты шараға Түркістан облысынан Сәкен Қалқаманов бастап барған делегация қатысуда. Делегация құрамында Арыс қаласының бас сәулетшісі Н. Жанбатыр, өнер жанашыры Әли Аппаз, Шымкент қаласынан архитектор Мұхит Көшеновтер бар.
