ТҮЛКІБАС АУДАНЫНДА 185 ШАРУА ҚОЖАЛЫҚ БИЫЛҒЫ ЖЫЛЫ БІР АЛҚАПТАН 2-3 ӨНІМ АЛУДЫ КӨЗДЕП ОТЫР…

Бүгінде Түлкібас ауданында шаруалар тарапынан бір алқаптан жылына 2-3 өнім алу жұмыстары жүйеленіп, қарқын алып келеді.
Биылғы жылы аудан аумағындағы 14 ауылдық округте 185 шаруашылық бұл бағытта жұмысын бастап кетті.
Тарқатып айтатын болсақ аталған шаруа қожалықтар жалпы 186 гектар егін алқабына картоп, қызанақ, пияз, аскөк т.б осы секілді шаруашылық дақылдарының түрлерін орналастырған.

Солардың ішінде соңғы жылдары бұл бағытта өз алқаптарынан мол өнім алып жүрген «Ерсары» шаруа қожалығы да бар.
Қожалық биылғы жылы 5 га жерге бірінші және екінші өнімге жаздық және күздік қияр егіп отыр. Ал 2 га жеріне пияз егіп, оны ағымдығы жылдың шілде айының орта тұсында теріп алып, екінші өнімге күздік қияр отырғызбақшы. Жиналған өнімді аудандық «Песня лета» ЖШС-мен келісім шартқа отырып, көкөніс өнімдерін өндейтін цехына өткізуді көздеп отыр.

Өткен жылмен салыстырғанда биыл бір жерден 2-3 өнім алушы шаруалардың қатары артқан. Яғни, өткен жылы 155 шаруа қожалық бұл бағытта жұмыс жүргізсе, аудан әкімдігі тарапынан жүргізілген жүйелі жұмыстың нәтижесінде биылғы жылы 185 қожалық бір жерден 2-3 өнім алуға қызығушылық танытып отыр.
Бұл бағытта өткен жылы облыс әкімі Өмірзақ Шөкеевтің тапсырмасына сәйкес, аудан әкімі Нұрлан Байғұттың бастамасымен арнайы семинарлар өтіп, биылғы жылы жемісін беруде.