БАЛАЛАРҒА БАЗАРЛЫҚ!

Төлеби ауданындағы отбасы үлгісіндегі балалар ауылының оқушыларына демеушілер ерекше сыйлық жасады. Төлеби аудандық Жастар ресурстық орталығының ұйытқы болуымен еліміздің білім беру саласындағы бірегей платформалардың бірі «Daryn.Online» мекемедегі барлық тәрбиеленушіге түрлі пәндердің 1 жылдық курсын тегін оқуға сыйға тартты. Курс сабақтарына қатысу арқылы оқушылар мектептегі барлық пәндерді тереңдетіп оқуға, робототехниканы үйренуге және музыкалық аспаптарда ойнауға, ең бастысы ҰБТ-ға дайындалуға мүмкіндік алады.

Бүгінде Бірінші Мамыр ауылдық округінде орналасқан отбасы үлгісіндегі балалар ауылында 5 пен 18 жас аралығындағы 60 бала тәрбиеленеді. Оның ішінде 7 оқушы биылғы мектеп бітіруші. Түлектер енді ешқайда бармай-ақ, қолданыстағы ноутбук құралдарымен онлайн дайындыққа қатыса алады.
Айта кетейік, 60 балаға арналған 1 жылдық курс сабақтары сатып алынатын болса, құны 5 млн. теңгеден асатын көрінеді. «Мұның барлығы да балалардың болашағы мен сапалы білім алуы үшін жасалып отыр», —  дейді республикалық «Daryn.Online» платформасының Түркістан облысы бойынша филиалының басшысы Бәйдібек Қуатбай. Аталған мекеме басшысының айтуынша, онлайн курсқа қатысатын балалар үнемі бақылауда болады. Жақсы нәтиже көрсеткен оқушыларға қосымша курстар тағы да тегін сыйға беріледі екен.
Демеушілер бұған дейін қайырымды істердің ортасынан табылып, дәл осы мекеме оқушыларына спорттық киімдер де тарту еткен болатын.

aigak.kz