МЕКТЕПКЕ ГЕНЕРАЛ САБЫР РАҚЫМОВТЫҢ ЕСІМІ БЕРІЛДІ

Шымкент қаласындағы білім ордаларының біріне Кеңес Одағының Батыры Сабыр Рақымовтың есімі берілді, деп хабарлайды Айғақ-ақпарат.

1956 жылдан бері Хамза атында болған мекеме енді №53 Сабыр Рақымов атындағы жалпы орта мектебі деп аталады. Білім ордасының атауын өзгертудің басты себебі — Шымкент қаласында дәл осындай үш мектептің болуы. Мекеме атауын ауыстыру өткен жылдан бері жоспарға алынып, бүгін міне жүзеге асуда. Бұл тарихи оқиға Тәуелсіздіктің 30 жылдығы, Жеңістің 76 жылдығы қарсаңында орын алып отыр.
Салтанатты шарада батыр туралы ақпараттар айтылып, ерліктері насихатталды. 2 мыңнан аса оқушы білім алатын оқу ордасының ұжымы батыр атына кір келтірмеуге сенім білдірді.Бұдан бөлек, Сабыр Рақымовтың есімі Қазығұрт ауданы Көкібел ауылындағы мектепке берілген. Сондай-ақ, Шымкент қаласындағы Жеңіс саябағына ескерткіші орнатылған. Сонымен қатар, батырдың есімі тек Қазақстанда ғана емес шетелдерде де танылған. Мәселен, Өзбекстандағы ауылдар, мектептер, Ташкенттің бір ауданы, көшесі, метро бекеті Рақымов есімімен аталады. Ал, Польша елінде бір траулерге генерал Рақымов есімі берілген.

Айта кетейік, Рақымов Сабыр Омарұлы қазіргі Түркістан облысы Қазығұрт ауданында 1902 жылы дүниеге келген. Ұлы Отан соғысы кезінде ерекше ерлігімен көзге түсіп, 4 рет Қызыл Ту, Қызыл Жұлдыз, ІІ дәрежелі Суваров және Ленин ордендерімен марапатталған. Сабыр Омарұлы 1945 жылы Польшада қаза тауып, сүйегі Ташкент қаласындағы бауырластар зиратына жерленген.