Бұл туралы Қазақстан Республикасының Экология, геология және табиғи ресурстар министрі Мағзұм Мырзағалиев Twitter парақшасында жазды.
«Қызылорда облысына жұмыс сапары аясында Аралдың құрғаған ұлтанында сексеуіл отырғызу жұмыстарын көріп қайттым. Теңіз табанының тұзы мен құмды тұрақтандырудың экологиялық тиімді және қауіпсіз жолы – байырғы өсімдіктер егу. Сондықтан 2008 жылдан бері 195 мың гектардан аса жер аумағына сексеуіл егілген»,- деп жазды ол.
Министрдің сөзінше, теңіз табанында сексеуіл егу жұмысының ауқымы одан сайын кеңейеді.
«Аралдағы экологиялық апат аймағы Президент Қасым-Жомарт Тоқаевтың ерекше бақылауында. Теңіз табанындағы құрғаған жерлерді ормандандыру үшін Мемлекет басшысының 2 млрд ағаш егу тапсырмасы аясында біз 2025 жылға дейін 213 мың гектарға тең аумаққа сексеуіл егуді жоспарладық. Алайда, бұл көлем де жеткіліксіз деп санаймыз. Сондықтан біз
Арал табанында сексеуіл отырғызудың арнайы бағдарламасын қабылдауға ұсыныс жасап отырмыз. Көршілес Өзбекстан мемлекетімен де осы жұмыс аясында тәжірибе алмасу шаралары жалғасады. Отандық ғалымдармен де бірлескен экспедиция ұйымдастырылады»,- деп хабарлады министр.
Мырзағалиев Қызыорда өңіріне жұмыс сапары барысында фитоорманмелиорациялық жұмыстардың қарқынын көріп шықты.
«1 мың гектарға 1,8 млн көшет отырғызылғанын көрдік. Ағаш егу күзде жалғасады. Жұмыс қарқынын одан сайын арттырамыз»,- деді Мағзұм Мырзағалиев.
