8-ші сәуір, бейсенбі күні Түркістан облысының Санитариялық-эпидемиологиялық бақылау департаментінің басшысы Нұрбек Нышанов өңірлік коммуникациялар қызметінде өткен брифингке қатысты. Бас мемлекеттік санитариялық дәрігер короновирусқа қарсы вакцинаның пайдасы мен өңірдегі эпид ахуал жағдайына тоқталды.
«Өздеріңізге белгілі мемлекет басшысы 1- ші сәуір күні коронавирус індетіне байланысты өткізген кеңесте еліміздегі күрделі эпидемиологиялық ахуал жайын жан-жақты талдап, короновируспен күресудің бірден-бір сенімді жолы вакцина салу екенін атап өтті. Түркістан облысына қазіргі таңға дейін жеткізілген 23 400 дозаның 1-компонентін 22591 адам қабылдады. 9612 азамат вакцинаның 2-ші компонентін алған. Сәуір айының соңына дейін өңірге 83100 дозасы жеткізіледі деп күтілуде»,-деп атап өтті Нұрбек Нышанов.
Түркістан облысында екпе қабылдауға ниетті азаматтар санының артуына байланысты қосымша доза алуға ұсыныстар әзірленуде.
Өңірде екпе салдырғандардың арасында ешқандай теріс әсерлер мен асқынулардың жағдайы тіркелмеді. Түркістан облысы эпидемиологиялық бағалау матрицасы бойынша 100 мың халыққа шаққанда аурудың апталық тіркелуі 10-15 ті құрап отыр. Өсу үрдісі байқалады. Егер аурушаңдықтың апталық тіркелуі 25 тен асатын болса сары аймаққа кіру қауіпі тұр. Сондықтан, Бас мемлекеттік санитариялық дәрігер тұрғындарды карантин талаптарын қатаң сақтауға, маскалық режимді, дезинфекциялық шараларды ұстануға шақырады.
«Әр азамат өз денсаулығына өзі жауапты. Кешегі 7- сәуір күннің өзінде облыста 19 ковид, 16 пневмония жағдайы тіркелді»,-деді Нұрбек Садықбекұлы.
Түркістан облысының санитариялық-эпидемиологиялық бақылау департаментінің баспасөз қызметі.