Түркістанның 2 бірдей ауылы картада жоқ. Қазақстан картасына енбеген ауылдар ресми түрде Түркістан облысының аумағына кіретін болды, — деп хабарлайды aigak.kz тілшісі. Бұрын соңды беймәлім болып келген бұл олқылықтың орнын толықтыруға енді ғана ұсыныс беріліп отыр екен. 20 жылдан бері құжаттарын түгендей алмай жүрген тұрғындардың мәселесі Үкіметтің қолында.
2001 жылы Қазақстан мен Өзбекстан мемлекеттері арасындағы достастық жұмыстарының нәтижесінде Бағыс және Хиебон ауылдары Қазақстанға өткен. Алайда, сол кезде Оңтүстік Қазақстан облысының картасына енбей қалған. 2021 жылдың 29 наурызы күні өткізілген Сарыағаш ауданы мәслихатының сессия отырысында депутаттардың шешімімен Түркістан облыстық мәслихатына ұсыныс беріледі. Мәселе Бағыс және Хиебон елдімекендерін Түркістан облысының аумағына ресми түрде енгізу. Осыған байланысты 7 сәуірде Түркістан облыстық мәслихатының кезектен тыс сессиясы өтіп, депутаттар мәселені бірауыздан қолдады. Сарыағаш ауданының шекарасын бекіту Үкіметке ұсынылды. Өзбекстан Республикасынан Қазақстан Республикасына өткен Бағыс ауылы Сарыағаш ауданының Ақжар ауылдық округіне және Хиебон ауылы Құркелес ауылдық округіне енеді.
Қазақстан Республикасы Премьер-Министрінің орынбасары Е.Л.Тоғжановтың Түркістан облысы, Сарыағаш ауданы, Бағыс ауылына жұмыс сапарының қорытындысы бойынша өткізілген мәжілістің хаттамасына сәйкес Бағыс, Хиебон елді мекенін Сарыағаш ауданы құрамына енгізу жөніндегі жұмыс тәртібі бекітілген. Осы бекітілген жұмыс тәртібімен Бағыс, Хиебон елді мекендері орналасқан аумағына шаруашылық аралық жерге орналастыру жобасын әзірлеу тапсырылған. Қазіргі таңда Бағыс, Хиебон елді мекендерінің аумағына шаруашылық аралық жерге орналастыру жобалары дайындалды. Бұл туралы Сарыағаш ауданының жер қатынастары бөлімі мен сәулет және қала құрылысы бөлімінің бірлескен ұсынысында белгіленген.
Құжаттарға сүйенсек, Бағыс елдімекенінің жер аумағы 750 га құрайды. 244 тұрғын үйі бар, 4 бірдей әлеуметтік нысан жұмыс жасайды.
Ал Хиебон ауылының аумағы 45,62 га. Құжаты рәсімделмеген 23 тұрғын үй бар.