Түркістан қаласын Түркі әлемінің рухани астанасы деп жариялады. Бұл тек еліміз үшін ғана емес, күллі түркітілдес халықтарына ортақ мақтаныш болып отыр.
Түркістан өзінің ғасырлар бойғы тарихында өзінің қайталанбас келбетін сақтап, өзіндік сипатын қалыптастырып, тағдырын айқындады. Бұл ежелгі қала өзінің даму кезеңінде әрдайым мәдениет пен өркениет, сауда-саттықтың орталығы болды. Ол өркендеу, құлдырау және қайта туылу кезеңдерін бастан кешірді. Тарихи тұрғыдан Түркістан халқы көпұлтты, бірақ оның көп бөлігі мәдениеттің, тіл мен діннің бірлігі біріктірілген түркітілдес халықтардан тұрады.
Еліміздің Тұңғыш Президенті – Елбасы Н.Назарбаев тәуелсіздіктің алғашқы жылында Түркістанға жасаған сапары барысында «Түркістан бірлік пен ынтымақтың ордасы» екендігін айта келіп, сол кезден бері рухани ордаға ерекше назарын аударып келеді.
Сондай-ақ, Саммиттте Қазақстанның Тұңғыш Президенті облыс орталығы 2018 жылы Шымкент қаласынан Түркістанға көшіріліп, сол уақыттан тұтас өлкенің жаңа тарихы басталғанына тоқталды.
– Екі жыл ішінде қала түбегейлі өзгерді, бұл жұмыс әлі де жалғаса береді. Қаланың келешек архитектуралық келбетін қалыптастырғанда, әлбетте, тарихи сабақтастық сақталады, – деді Нұрсұлтан Әбішұлы.
Ал, Мемлекет басшысы Қасым-Жомарт Тоқаев аталмыш Түрік кеңесі Саммитінде Түркістанның барлық түркі халықтары үшін қастерлі қара шаңырақ, құтты мекен және аңсарлы атажұрт екенін айтты. Бабаларымыздың осы өңірде ғұлама ұстаз Қожа Ахмет Яссауиден діни білім алып, түркі-ислам мәдениетін әлемге таратқанын, түркілер Кіші Азияға бет бұрғанда бұл құндылықтар түп-тамырымызды сақтап, бірлігімізді бекем ұстауға негіз болғанын атап өтті.
Түркістан — Қазақстанның тарихи, мәдени орталығы мен ежелгі қалаларының бірі. Бұл жер өткен заманның баға жетпес сәулетімен ерекшеленген және тарихи орындар мен зияткерлік туризмді сүйетіндер үшін танымал орын болып табылады.
Қазақстанның рухани астанасы Түркістан сонау Ұлы Жібек жолындағы басты қалалардың бірі болған кезеңіндегі маңызы қайта оралды, одан да биіктей түсті. Түркістанның жаңа мәртебесі біздің заманымыздың шындығымен белгіленетіні және біз үшін және көрші түркітілдес елдер үшін маңызы зор екендігі сөзсіз. Осы тұрғыда Түркістанның мәдени-экономикалық дамуын дамыту және тереңдету өте жоғары басымдылық пен перспективалық жоба болып табылады.
Дулат ӘБІШ,
Түркістан облыстық мәслихатының депутаты.
