Жамбылда Шәкен Ниязбековтің есімі ұлықталды

Жамбыл облысында қос қуаныш. Наурыз мерекесі қарсаңында Шәкен Ниязбековтің құрметіне «Ту — Тұғыр» ескерткіші бой көтерді. Ескерткіштің ашылуына облыс әкімі Бердібек Сапарбаев қатысып, тұрғындарды Ұлыстың ұлы күнімен құттықтады.

Мемориалдық кешен «Батыс Қытай — Батыс Еуропа» транзиттік автожолының бойында, Тараз қаласының маңындағы, Бұрынғы Бесжылдық ауылының іргесінде салынды. Енді бұл ауыл — Қазақстан Республикасының мемлекеттік туының авторы Шәкен Ниязбековтің есімімен аталады. Көптен күткен жаңалықты естіген ауыл тұрғындарының қуанышында шек жоқ.

Шәкен Ниязбековтің 85 жылдық мерейтойы қарсаңында еңсе тіктеген ескерткіштің биіктігі 23 метр. Еске алу мемориалдық кешенінің авторы Жомарт Сәтбайұлы Қонысбаев. Ескерткіштің құрылысына Жамбыл облысының қазынасынан 41 млн. теңге қаржы жұмсалған.

Көк туымыз көкте жазыла желбірегенде толқымайтын адам жоқ. Әлем елдері тамсана қарайтын көк туымыздың тарихы жайында профессор, медицина ғылымдарының докторы Сайлаубек Шалқаров, ту авторы Шәкен Ниязбековтің өз аузынан естіген естелігімен бөлісті.

Көк ту – бүкіл ұлттың тәуелсіздігінің белгісі. Мемлекетіміздің мызғымас рәмізі тудың тұғырға қонған сәтін тамашалауға Түркістан облысынан қоғамдық делегация келді. Елбасының курстасы, КСРО Мемлекеттік сыйлығының лауреаты, Қазақстанның құрметті металлургі, Түркістан облысының және Шымкент қаласының «Құрметті азаматы», «Құрмет» орденінің иегері Аманәлі Әбдіраманов, Түркістан облыстық мәслихатының депутаты, “Құрмет” , “Парасат” ордендерінің иегері Дулат Әбіш, Төлеби ауданы, №6 жалпы орта мектебінің директоры Ғалымжан Мырзалы бар. Жамбыл облысының әкімі Бердібек Мәшбекұлы арнайы ат басын бұрып, қуанышқа ортақтаса келген қауымға алғысын білдірді.

Айғақ-ақпарат