Талай мақаланың авторы болған журналист зейнет жасына жетті. 40 жыл бір салада табжылмай жұмыс жасаған — Нұрлан Кенжеғұлов 63 жасқа толып отыр. Отырар ауданы, Шәмші ауылында дүниеге келген қаламгердің өмір жолына үңілсеңіз айналасын тек жақсылар қоршаған. Бір сыдырғы мінезі бар азаматтың соңынан жаман сөз ермеген.
Жақсылардың жолын жалғаған Нұрлан Кенжеғұлов 1982 жылы Әл-Фараби атындағы Қазақ Ұлттық университетін аяқтап, Оңтүстік Қазақстан газетіне жұмысқа тұрады. Сол сәттен бері қара шаңырақта еңбек етіп, өмірін аймақтағы жаңалықтарды жазумен өткізген жан. 1991 жылы «Шымкент келбеті» газеті ашылған сәтте он жылдай жұмыс жасап, жаңа баспаның аяқтан тұрып кетуіне үлес қосты. Кейін алғашқы еңбек жолын бастаған «Оңтүстік Қазақстан» газетіне қайта оралады. Міне, осындай ортада шыңдалған Нұрлан Кенжеғұлов үшін баспасөз бағыты қашанда қымбат. «Алтын қауырсын», «Үздік журналист» номинацияларының иегері. Жұмыста да, отбасында да айы оңынан туған. Зейнет жасына жеткен Нұрлан Кенжеғұловты ұжымы мен Түркістан облысы Ішкі саясат басқармасының басшысы құттықтап, таң сәріден ізгі тілектерін білдірді.
