Түркістан облысында қылмыстық көрсеткіш төмендеді

Түркістан облысы қылмыс көрсеткіші бойынша ең төмен аймақ. Бұл туралы Түркістан облыстық полиция департаментінің бастығы Қайрат Дәлбеков қоғамдық кеңестің отырысында мәлімдеді.Атқарылған жұмыстар жайын баяндап, өзге де мәселелерге тоқталды. Айтуынша, қылмыстық істердің жолын кесу бағытындағы жұмыстар жүйелі  түрде жүргізіліп келеді. Атап айтсақ, қаржы пирамидаларына тосқауыл қойылып, алаяқтыққа жол бермеу үшін тиісті іс-шаралар жалғасуда. Қайрат Дәлбеков бұдан өзге ресейлік автокөліктерді тіркеуге алу қажеттілігін тілге тиек етті. Өйткені облыс аумағында орын алған жол көлік оқиғаларының басым көпшілігі дәл осы ресейлік автокөліктерде болған. Сондай-ақ Көші-қон заңнамасын бұзған 2106 азаматқа айыппұл салынған.Қоғамдық кеңестің отырысында өзге де  мәселелер талқыланды. Кеңес мүшелері жайылымдық жерлердің жайына алаңдаушылық білдірді. Кейбір аудандардың аумағында егістік алқаптарын қорғау үшін жерді тереңдете қазып тастаған. Бұл —  заңсыз іс-әрекет. Жайылымдық жерлерге залал келтіріп қана қоймай, мал өліміне әкеп соқтыратыны жасырын емес. Мұндай заң бұзушылыққа жол берген шаруалар әкімшілік жауапкершілікке тартылады. Отырысқа кеңес мүшелері мен бірқатар басқарма басшылары қатысты.

Айғақ-ақпарат