Қазақстанның Тұңғыш Президенті АН-26 әскери ұшағының апатқа ұшырауынан қаза тапқандардың туыстары мен жақындарына көңіл айтты, — деп хабарлайды elbasy.kz.
– Алматы қаласының әуежайында ұшақтың апатқа ұшырауы салдарынан адамдардың қаза болғаны туралы хабарды күйзеліспен қабылдадым. Қайғыларыңызға ортақтаса отырып, қаза тапқан әскерилердің туыстары мен жақындарына көңіл айтамын. Зардап шеккендердің тезірек сауығып, отбасыларына оралуына тілектестік білдіремін, – делінген Елбасының жеделхатында.
Сондай-ақ, мемлекет басшысы Қасым-Жомарт Тоқаевтың тапсырмасымен әуе апатының себептерін анықтау жұмыстары жүріп жатыр. Мұндай оқыс оқиғалар қайталанбауы қажеттігін твиттерде жазған Президент ұшақта қаза болған әскери қызметкерлердің туыстары мен жақындарына көңіл айтты. Жарақат алғандардың тезірек сауығып кетуін тіледі.
ҚР Төтенше жағдайлар министрлігі таратқан хабарламаға сәйкес, 13 наурыз күні сағат 17.22-де «Нұр-Сұлтан-Алматы» бағытында ұшқан ҰҚК-нің АН-26 әскери ұшағы радардан жоғалып, авариялық жағдайда Алматы әуежайына қонған.
Оқиға орнына 11 өрт сөндіру бөлімінен, республикалық жедел-құтқару жасағынан 9 адам, 1 бірлік техника, 1 кинологиялық есеп; Алматы қаласының Құтқару қызметінен 5 адам мен 1 бірлік техника жұмылдырылған.
Іздестіру және авариялық-құтқарумен қамтамасыз ету қызметінен 4 бірлік техника, Алматы облысы ТЖД «ӨС және АҚЖҚ» ММ 2 бірлік техника оқиға орнында жұмыс жасауда. Ұшақтан шыққан жану сөндірілді.
Хабарламадағы мәліметке сүйенсек, 4 адам қайтыс болды, жарақат алған 2 адам Алматы қалалық 4 клиникалық ауруханаға жеткізілген.
Оқиға орнына ҚР ТЖМ аумақтық бөлімшелерінің күштері мен құралдары қосымша жіберілді.
