Қожа Ахмет Ясауи атындағы Халықаралық қазақ-түрік университетінің ректоры қызметіне Жанар Амангелдіқызы Темірбекова тағайындалды. Жанар Амангелдіқызын ХҚТУ ұжымына ҚР Білім және ғылым вице-министрі Шолпан Таңатқызы таныстырды.
Аталған жиынға Түркістан облысы әкімінің орынбасары Сәкен Қалқаманов, ректор өкілі Женгиз Томар мен университет ұжымы қатысты.
Университет ректоры Жанар Амангелдіқызы өз сөзін, Ұлы баба Ахмет Ясауидің хикметінен бастады және де өзіне жүктелген жаңа қызметтің жауапкершілігін терең сезінетінін жеткізді. Ендігі жерде Елбасымыз ашып берген университеттің ең негізгі міндеті қазақ елі мен бүкіл түркі әлеміне қызмет ететін білімді, салауатты, отансүйгіш, әрі жаңа ғасырдың талаптарына сай мамандарды даярлау екендігін айтты. Сонымен қатар, бабамыздың атымен аталатын оқу ордасының қызметшілері ретінде қазақ ұлтының рухын жаңғыртып, Қазақстан деп аталатын отанымызды дамытып асқақтатуды маңызды міндет ретінде санайтындығын жеткізді.
«Мәдениет пен өркениеттің негізі болған университет білім арқылы терең біліктен туындайтын ынтымағымен жастарды әлпештеп, мәпелеп, тәуелсіз елдің мәңгі болашағын қазірден қалыптастырушы, қоғамға үлгі болатын қасиетті мекеме . Мемлекет басшысы Қасым-Жомарт Кемелұлы «Халық үніне құлақ асатын үкімет» тұжырымдамасын қабылдаған еді, мен де өз кезегімде осы тұжырымдамадан шабыт алып, «Халық үніне құлақ асатын университет» концепсиясын бірге қалыптастыруды қолға аламын», – деді жаңа ректор.
Жанар Амангелдіқызы Темірбекова, Түркияның алдыңғы қатарлы Хаджетепе университетінің инженерлік факультетін бітіріп, аталмыш оқу орнының Менеджмент мамандығы бойынша магистратура бағдарламасында білім алды.
Әл-Фараби атындағы Қазақ ұлттық университетінде аспирантура оқып, сол жерде кандидаттық диссертациясын қорғады. Экономика ғылымдарының кандидаты.
Жанар Амангелдіқызы, Ахмет Ясауи Халықаралық қазақ-түрік университетінің Анкара қаласындағы Өкілетті Кеңесінде қызмет атқарған. Сонымен қатар, ТҮРКСОЙ сынды халықаралық ұйымдарда да еңбек еткен тәжірибелі маман.
Қазақтанда Алматы қаласындағы КИМЭП, КБТУ және СДУ сынды бірнеше маңызды оқу орындарында сабақ беріп, басшылық етті.
Еуразия технологиялық университетінің ректоры лауазымында да абыроймен қызмет атқарды.
Сонымен қатар, Алматы менеджмент университеті Президентінің кеңесшісі болды.
– Н.Назарбаев қорының Ғылым және техника саласындағы сыйлықтың лауреаты (2012);
– БҒМ «ЖОО ең үздік оқытушысы» грантының иегері (2013);
– Халықаралық ғылыми журналдар мен монографиялармен қоса 40-тан астам ғылыми еңбегі бар. H indeksi: 5; i10:2, сілтемелер индексі : 235;
– The International Journal of Entrepreneurship and Innovation; African Journal оf Business and Management; Gaziantep University Journal of Social Sciences халықаралық академиялық журналдарында рефери;
– Нұрсұлтан Назарбаев Қоры Ғылым кеңесінің мүшесі;
– АҚШ-тағы Халықаралық Көшбасшылық Ұйымының мүшесі.
– Халықаралық аналитикалық орталық Тиллотома қорының құрметті мүшесі (Science and Education Policy Group).
Қазақ тілі – ана тілі, сонымен қатар орыс, түрік және ағылшын тілдерін еркін меңгерген.
