Сақтықта қорлық жоқ!

    Электр жүйесі дұрыс жұмыс істемейтін Ақжар елдімекеніндегі үйге газ сигнализаторы мен   жаңа электр құрылғылары орнатылды. Біраз уақыт бұрын  қайғылы оқиғалардың алдын алу бойынша Абай аудандық Төтенше жағдай басқармасы аймақта түсіндірме жұмыстарын жүргізген еді. Нәтижесінде бірнеше үйде өрттің шығуына себеп болатын техникалық ережелердің сақталмағандығы  анықталған.Үйдегі көгілдір отын мен электр көзінен шығатын өрттің алдын алу мақсатындағы рейдтік шара Сұлутөбе көшесі 21-ші үйдегі жандарға жарық сыйлады. Сақтық ережелерін қадағалаумен басталған жұмыстың соңы – қайырымдылыққа ұласты. Бұдан алдын да азық-түлікпен көмек көрсетілген отбасыға арнайы мамандарды әкеліп, сымы апаттық жағдайда тұрған ток көздерін қалыпқа келтіріп берді.Оқиғаның басы-қасында болған Абай аудандық Төтенше жағдайлар басқармасының бастығы Ғалымжан Әбіләкімұлы: «Соңғы уақытта үйдегі техникалардан шығатын апаттық жағдайлар көп орын алып кетті. Соның алдын алу бойынша түсіндірме жұмыстарын жүргізіп, сақтық шараларын сақтауға шақырып жатырмыз»,-дейді.

Әлеуметтік жағынан аз қамтылған отбасылардың бірі – Cабырбековтер  отбасы. Анар әжейдің 25 мың зейнетақысы мен ІІІ топтағы мүгедек отағасының 39 мыңдық  жәрдемақысымен күн кешетін үйге бұл – үлкен қуаныш болды. Есіктен кіргенде балалардың жымың қаққан жанарынан оны байқамау мүмкін емес.

Тұрғындардың амандығын сақтау мақсатындағы істің соңы қайырымдылыққа ұласып, көмек қолын созғандарға отанасы — Алтыншаш Нысанбекова алғысын білдірді. Қайғылы жағдай кез келген жерде: үйде, көшеде, жолда орын алуы мүмкін. Оны болдырмау үшін сақтық шараларын қатаң ұстап, мамандардың айтқан құлаққағысы мен ескертпелеріне көңіл бөлу керек. Себебі өмірімізге ол азаматтар емес, бастысы – өзіміз жауаптымыз.

Айғақ-ақпарат