АРДАГЕРЛЕРДІ АРДАҚТАЙЫҚ

 Шымкент қаласының жастары Ұлы Отан соғысының ардагерлеріне құрмет көрсетті.

Әдетте тек 9 мамыр – Жеңіс күні ғана еленетін қариялар бүгін жастардың қошеметіне бөленді. Демеушілер есебінен азық-түліктер табысталып, үй шаруасына жәрдемдесті. Кездесудің мақсаты – ардагерлер мен жастарды байланыстыру, патриоттық тәрбиені нығайту. Ұлы Отан соғысының ардагері Тілеуімбет Қожаназаров 1925 жылы Қызылорда облысы Қазалы ауданында дүниеге келген. Соғыс уақытында Украина жеріне  аттанып, КСРО-ны азат етуге ат салысқан. Қазіргі таңда Шымкент қаласында тұрады. 7 ұл-қыз тәрбиелеп, 16 немере, 6  шөбере көріп отыр. Сұм соғыстың естеліктерін есіне түсіріп, көп сөз қозғағысы келмеді. Көңілін сұрап келген жастарға алғысын білдіріп, батасын берді.   «Ардагерлерді ардақтайық» іс-шарасы «Jas Otan» жастар қанатының партиялық жобасы. Мақсаты – ұрпақтар сабақтастығы мен диалог алаңын қалыптастыру. Қоғамда ынтымақ, патриотизм, қарт адамдарға және дәстүрге деген құрметті күшейту. Шымкент қаласында 20 соғыс ардагері болса, бүгінде алғашқы 5 қарияның үйіне дәл осылай көмек көрсетілген екен. Алдағы наурыз айында барлық ардагерлерді қамту жоспарланған. «Ең бастысы — мерекесіз, себепсіз жеңіс сыйлағандарға ыстық ықылас сыйлау»-,  дейді  «Jas Otan» жастар қанатының Шымкент қаласы филиалының төрағасы. aigak.kz