Шымкент: Эпидемиологиялық ахуал тұрақты

   Вакцинациялаудың екінші кезеңі наурыз айында басталады деп жоспарланып отыр. Педагогтар мен тәртіп сақшыларына егілетін вакцина Қазақстанда жасалған. Яғни, Qazcovid-In препараты. Бұл туралы Шымкент қаласының бас дәрігері БАҚ өкілдерімен өткізілген брифингте айтып берді. Қазіргі уақытқа дейін 705 медицина маманы екпені салдырып үлгерген. Ерікті түрде жүргізіліп жатқан вакцина салуға өтініш білдіргендер мен екпе алмаған адамдарға арналған электронды паспорт Шымкент қаласында да жүзеге асырылады.

   Жыл басынан бері Шымкентте 472 адам коронавирус инфекциясын жұқтырған. Оның 96-сы кәмелет жасқа толмаған мектеп оқушылары. Соңғы мәліметтерге, сәйкес індеттің ілмегіне ілінгендердің басым бөлігі жазылып шығуда. Дегенмен, 15 адам көз жұмыпты. Мектеп оқушылары вирусты қай жерде, кімнен жұқтырды деген сауал ойға бірінші келеді. Ал, білім ордаларының жұмысына бұл жайт кедергі емес пе?

   Қаладағы барлық білім беру объектілері күшейтілген санитарлық-эпидемиологиялық бақылауда. Бұл сауалға алдағы уақытта нақтылап жауап беретін боламыз. Вирусты жұқтырған жасөспірімдердің көпшлігі оффлайн режимде білім алып келген, — деді Шымкент қаласы Денсаулық сақтау басқармасының басшысы Бақытжан Жолдасбекұлы.

Баспасөз мәжілісінде басқарма басшысы медицина қызметкерлерінің тәжірибесіне де тоқталып өтті. 2020 жылдың наурыз айынан бастап  шымкенттік мамандар қашықтықтан 15 мыңнан аса тәжірибе алмасу сағаттарына қатысқан. Алдағы уақытта  тағы да коронавирусқа қарсы күресу тәсілдері, оның алдын алу бойынша сабақтар ұйымдастырылады деп жоспарланып отыр.

Айғақ-ақпарат