Шардарада ұзындығы 311 шақырымды құрайтын канал арналары бетондалуда

   Жерасты суының жақын болуы және жер бетіне тұзды судың көтерілуі Шардара ауданының басты мәселелерінің бірі болып саналады. Осы тұрғыда 2016 жылдан бері ПУИД-2 ирригациялық дренаж жүйелерін жетілдіру және жөндеу жобасы іске асырылуда. Осыған сәйкес 2019 жылдың желтоқсан айынан бастап аудандан жалпы ұзындығы 311 шақырымды құрайтын каналдарды тазалау, бетонмен қаптау жұмыстары басталған. Аталмыш ауқымды жоба аясында гидроқұрылыстар яғни ағын су тоспалары, су өлшегіш қондырғылар салу да қарастырылған.    Жобалық құны 23 млрд теңгеден асатын ауқымды жоба Алатау батыр және Қызылқұм ауылдарында жүзеге асырылып жатса, аймақта 404 шақырымды құрайтын ағын су қашыртқылары тазалануда. Оған қоса, Шығыс және Батыс қашыртқылары арқылы жиналып қосылған  ағын суды  Көксарай су реттегішінің төменгі сағасы арқылы Сүткент және Байырқұм ауылдарының маңы арқылы өтетін Сырдария өзеніне қосу және сол жерге қосымша 19,3 шақырым ағын су қашыртқысын салу қолға алынуда.    Ал, мұндағы күрделі жөндеу жұмыстарын Қызылордалық «Мелиоратор» ЖШС мен Израильдік «Тахал» мердігер компаниялары жүргізіп жатыр. Дәл қазір құрылыста 600-ге жуық азамат жұмыс істесе, олардың 30 пайызы жергілікті ауыл тұрғындар. Аталмыш ауқымды жоба толықтай аяқталған кезде Шардара ауданы бойынша 12 мың 500 гектар егістік жерді суару мүмкіндігі жақсармақ. Бұл туралы аудан әкімінің орынбасары Ағатай Тәженов мәлім етті.Айғақ-ақпарат