Жастарға арналған жаңа жоба

    Үшінші мегаполисте қала әкімдігінің бастамасымен мектеп оқушыларының арасында «Шымкент жастар лигасы» жобасы ұйымдастырылмақ. Аталмыш жоба карантинге қарамастан 15 мыңға жуық жасты қамтуды жоспарлап отыр.
Жастар арасында салауатты өмір салтын ұстану, сондай-ақ интеллектуалды ойлау қабілетін дамыту, ерік пен табандылықты қалыптастыру және Қазақстан Республикасының чемпионаттарына команда жасақтау мақсатында ұйымдастырылып отырған іс-шараның І кезеңі наурыз-мамыр айларында бастау алады. Жастар лигасына жалпы 151 мемлекеттік мектеп қатысады. Атап айтқанда, Абай ауданынан — 37, Әл-Фараби ауданынан — 25, Еңбекші ауданынан – 40, Қаратау ауданынан — 38 білім ордасының оқушылары әр ауданның абыройын қорғау үшін бақ сынайтын болады. Сондай-ақ, қала аумағындағы 4 ауданнан финалдық ойындарға 16 команда жолдама алады.    Жастар лигасына қатысушылар шахматтан, ұлдар арасында футбол және баскетбол, қыздар арасында волейбол сынды спорт түрлерінен жарысатын болады. Оларды қолдау мақсатында фан-клубтар да құрылмақ. Әрбір команданың атауы, ұраны, эмблемасы және команданың бірыңғай киім үлгісі жасақталады.    Наурыз айында бастау алатын жастар лигасының дайындық жұмыстары мектеп спорт залдарында өткізілмек. Жауапты сала мамандарының сөзіне сүйенсек, санитарлық талаптарды сақтау басты назарда.    Анық болғандай, бұл жастар лигасында алыс-беріс, ауыс-түйісге жол жоқ дейді жауапты мамандар. Ең басты жүлде қоры әлі белгісіз.
Жобада Шымкент қаласы дене шынықтыру және спорт басқармасы бекіткен төрешілер төрелік жасайды екен. Бұл жайында бұқаралық спорт және инфрақұрылым бөлімінің басшысы Мұхтар Шаханов брифинг барысында мәлімдеді.
Ал, жарыс қорытындысы бойынша спорт түрлерінен І, ІІ, ІІІ орын алған командалар диплом, медаль және бағалы сыйлықтармен марапатталады.   Сонымен қатар, спорт түрлерінен, «Үздік қақпашы», «Үздік қорғаушы», «Үздік ойыншы», «Үздік білім беру мекемесі», «Үздік жетекші» номинацияларының жеңімпаздарына дипломдар табысталады.

Суреттер: Шымкент Ақпараттық Коммуникациялық Орталығы

Айғақ-ақпарат