Сайрам: 2020 жылы 7999 адам жұмыспен қамтылған

   Ел экономикасында айрықша орын алатын, мемлекет басты назарда ұстайтын бағыттың бірі – әлеуметтік сала. Мемлекет басшысының сындарлы саясатының арқасында жыл өткен сайын әлеуметтік саланың әлеуеті артып, жұмыссыздықпен күресу үшін әлеуметтік қолдау шаралары жүйелі түрде іске асып келеді. Ондағы негізгі мақсат — еңбек нарығындағы тепе-теңдікті сақтау, жұмыссыздық деңгейін төмендету. Дәл осы мақсатта Сайрам ауданында ауқымды жұмыстар атқарылуда. Атап айтсақ, өткен жылы ауданда 7999 азамат жұмыспен қамтылған. Мемлекеттік бағдарламалардың шарапатын көріп отырған кәсіпкерлер жетерлік. Тіпті пробациялық есепте тұрған азаматтар да назардан тыс қалмаған. Жалпы саны 28 азамат тіркеуде тұр. Денсаулығына байланысты кейбірі жұмыс істеуден бас тартқан көрінеді.    Санаттары бойынша саралайтын болсақ, жұмыссыз ретінде тіркеуде тұрған 2168 азаматты, нәтижесіз жұмыспен қамтылғандар санатында 2640 азаматты және жұмыс іздеуші ретінде жүгінген 2531 азаматты жұмыспен қамту көзделсе, 50 азаматты техникалық және кәсіби білімі бар кадрларды даярлау курстарына оқуға жолдау жоспарланды. Сондай-ақ елімізде орын алған әлемдік пандемия салдарынан еңбек нарығындағы тұрақтылықты сақтау мақсатында салалық министрлік тарапынан қабылданған дағдарысқа қарсы іс-шаралар негізінде, ауданымыздың кешенді жоспарына қосымша 1503 азаматты бағдарламаның белсенді шараларына қатыстыру міндеттеліп, жұмыспен қамтудың жалпы жоспары 8892 азаматқа ұлғайып отыр.    Сондай-ақ  4805 азаматты тұрақты бос жұмыс орындарымен және 294 азаматты бағдарлама аясында жаңа жұмыс орындарымен қамту жоспарланып, жыл қорытындысымен 3862 азамат тұрақты бос жұмыс орындарына жолданса, ал мемлекеттік және салалық бағдарламалар арқылы 68 жоба іске асырылып 294 азамат жаңа жұмыс орындарымен қамтылған.

Айғақ-ақпарат