Жылқыбаева: «Мүмкін сіздің перзентіңіз әлем чемпионы шығар?!

   «Мүмкін Сіздің перзентіңіз әлем чемпионы шығар?!» – деген жас бапкер ата-аналарға балаларын спортпен айналысуына жағдай жасаса, сенімдері сөзсіз шындыққа айналады деген пікірде. Он жеті жылдан бері самбо күресімен шұғылданып, айтарлықтай жетістікке жеткен түркістандық Айжан Жылқыбаева спорттағы жетістігі мен жеке өміріне қатысты айтты.    Айжан самбо күресімен 2-сыныптан бастап айналысып келеді. Осы күнгі аралықта балуан самбодан Қазақстанның 11 дүркін чемпионы, 5 дүркін Азия чемпионы атанып үлгерген. ҚР-ның әйелдер арасындағы ұлттық құрамасына да енгеніне 3 жылдан асқан. Әлемдік рейтингте 48 келі салмақ бойынша үздік үштіктің сапында. Әлемнің 3 рет күміс жүлдегері атануы да спортшының табандылығы мен төккен терінің нәтижесі.
Самбошы қыз 2017 жылы Түркіменстанның астанасы Ашхабад қаласында жабық кешенде өткен V жазғы Азия ойындарында алтыннан алқа тақса, 2018 жылы Индонезияның астанасы Джакарта қаласында өткізілген XVIII жазғы Азия ойындары кезінде ел қоржынын қола медальмен толықтырды. Самбодан ҚР спорт шебері.    «1995 жылдың 24 қаңтарында дүние есігін ашқанмын. Жанұяда бес жанбыз. Әкем Аманжол, анам Жанар, үлкен ағам Ерлан және кіші сіңілім Жасмин. Қаламыздағы А.Байтұрсынов атындағы №1 жалпы орта мектебін бітіріп, Қ.А.Ясауи атындағы ХҚТУ-дің спорт факультетіне оқуға түстім. Жоғарғы оқу орнын 2016 жылы ойдағыдай аяқтап, Ә.Нұрмаханов атындағы олимпиада резервінің мамандандырылған балалар мен жасөспірімдер спорт мектебінде самбо күресінің бапкері болып жұмыс жасаудамын», – деді ол.
Әпкесі Мөлдір Бейсембаеваның ықпалымен спорт әлемінің әліппесімен танысқан самбошы қыз бүгінгі таңда сіңілісі Жасминді де спортқа баулуда. Ал, осындай дәрежеге жетуін ардагерлер арасында самбодан 5 дүркін әлем чемпионы, Халықаралық дәрежедегі жаттықтырушы Әбсадық Халиллаев бапкерінің еңбегі деп біледі.

Нұртас Мұхтарұлы
«Түркістан облысы бойынша жауынгерлік өнер қауымдастығы» заңды тұлғалар бірлестігінің баспасөз қызметі