«ШЫМКЕНТ ЦИРК» АҢДАРДАН БАС ТАРТПАЙДЫ!

«Шымкент цирк» аңдардан бас тартпайды! Тек циркті жаңғырту бағытында көрермендерге жаңа жобаларды ұсынбақ. Әлемдегі ең жас цирктердің бірі «Шымкент циркі» биыл бірегей эксперименталды жоба бастамақ. Мегаполистегі іргелі мәдени ошақ ретінде өзіндік орнын қалыптастырып үлгерген Шымкент цирк Әз-Наурыз мерекесіне қазіргі таңда қызу дайындық жұмыстарын жүргізуде.Аң патшасы арыстанды тұңғыш бағындырған қазақ қызы Жанат Халметова әңгіменің ауанын бекзат өнердің белестерінен бастады. Ол өз сөзінде цирк – өмір мен өлім ортасындағы ұлы өнер деп те атап өтті. Сонымен қатар, «Шымкент циркті» аңсыз елестету тіптен мүмкін емес деп, әлеуметтік желіде желдей есіп жүрген ақпаратқа өз ойын ашына жеткізді. Жанат Халметованың айтуынша мұндағы аңдар ешқайда жіберілмеген. Баяғыдай тиісінше бапталып, көңіл бөлінуде. Сондай-ақ, цирк балансындағы 6 жылқы, 3 пони, 2 арыстан және бұдан өзге жыландар мен маймылдар күнделікті тамақтандырылып, циркте өнер көрсетуге дайындық жасайды.  Айта кету керек қазіргі таңда мұндағы қызметкер саны – 197. Соның ішінде шығармашылықпен айналысатын қызметкерлер саны – 126, ал шығармашылық әртістер саны – 59. 2021 жылы бірегей эксперименталды жобаны қолға алған Шымкент цирк көрермендерге ерекше шоу ұсынбақ. Жаңа техника, жарықшамдар, жаңа сценарий. Ендігі кезекте клоунада және шапито, джигитовка, жонглерлік еті және әуе гимнасттары секілді бағыттарды дамытпақ.Биыл 10 жылдық мерейтойын тойлайтын «Шымкент Цирктің» елімізде өзіндік қолтаңбасымен, кәсіби жоғары деңгейімен ойып алар орны бар. Цирк ұжымы — қызғалдақ қыздарымыздың өрнекті өнерін, бөрі текті жігіттердің отты жігерін шыңдап, сайыпқыран бабаларымыздың бекзат өнерінің үзігін бүгінгі заман талабына сай қайта жаңғыртып келеді.

«Айғақ» ақпарат