Асхат Жұмағали: Шымкентте жемқорлық екі есеге көбейген

ҚР Сыбайлас жемқорлыққа қарсы іс-қимыл Агенттігінің Шымкент қаласы бойынша Департаменті 2020 жылды қорытындылау мақсатында брифинг өткізді. БАҚ өкілдерінің қатысуымен болған жиында өткен жылғы жемқорлық деректері сараланды. Департамент басшысы Асхат Жұмағалидың айтуынша 2020 жылы Шымкент қаласында сыбайлас жемқорлыққа қатысты 118 дерек тіркеліпті. Ал, 2019 жылы бұл көрсеткіш 60 дерек болған. Яғни, өткен жылы пара алу оқиғалары екі есеге көбейген. Олардың ішінде бірінші орында білім саласы — 31 дерек. Одан бөлек, құқық қорғау блогында 20, ауыл шаруашылығы саласында 15, денсаулық сақтау саласында 12, әлеуметтік қамтамасыз ету және құрылыста 8, сондай-ақ жер қатынастарында 6 жемқорлық дерегі тіркелді. Ал олардың негізгі себептеріне тоқталсақ, көбіне жұмысқа қабылдау кезінде, ұстаздарға сағат бөлуде және мемлекеттік қызмет алуда жемқорлық орын алады. Департаменттің тексеріс жұмыстары нәтижесінде қала қазынасындағы 5,2 млрд. теңге тиімсіз пайдаланылмай, сақталып қалған. Жиында пара алып ұсталғандардың тізімі де жарияланды.
Пара алатындарды айттық ал пара беретіндер кімдер? Белгілі бір қызмет алу барысында пара ұсынатындар көбіне ауырдың астымен, жеңілдің үстімен жүруді қалайтындар және өз құқықтарын толық білмейтіндер мен өзіне сенімсіз адамдар.

aigak.kz