120-ға жуық азамат тегін заңгерлік көмек алды

«Халыққа заңды көмек» акциясы аясында 120-ға жуық азаматтарға заңгерлік құқықтық көмек   көрсетілді. Құқықтық сауаттылықты арттыруға бағытталған шара барысында тұрғындар сан түрлі сауалдарына жауап алды. Білікті мамандар кеңес беріп қана қоймай, мәселелерді шешуді де қолға алған.Мегаполисте алғаш рет өткізіліп отырған аталмыш акцияның мақсаты халықты құқықтық тұрғыда ағарту болып табылады. Жеке және заңды тұлғалар үшін адвокаттық және нотариаттық қызмет,  азаматтық құқықтық қатынастар, атқарушылық іс жүргізуді орындау, зияткерлік меншік құқықтарын қорғау салаларындағы мәселелерге байланысты бірқатар азаматтарға кеңестер берілді.

«Халыққа заңгерлік көмек» акциясы аясында мамандардың көмегіне жүгінген қала тұрғындарының қатары көп. Бірі алақтардың құрбаны болса, енді бірі жер мәселесін даулап келген. Қаржы пирамидаларының арбауына түскендер де аз емес. Әділеттілік іздеген азаматтар акция аясында арыз-шағымдарын арқалап, кәсіби мамандардың кеңесіне жүгінді. Көптен бері күрмеуі шешілмеген бірқатар мәселелер құзырлы органдарға жолданған. Түйткілді сұрақтарына тұшымды жауап алған қала тұрғындары мемлекеттік органдардың өкілдеріне алғыстарын білдірді.Сақ болмасаңыз алаяқтың арбауына оңай түсетін бүгінгідей заманда құқықтық сауаттылықты арттырудың маңызы зор. Заң бұзушылыққа жол бермей, өз құқығыңызды қорғай білу д өз қолыңызда. Жиі кәсіби мамандардың кеңесіне жүгінгеніңіз де артықтық етпес.

Айғақ-Ақпарат