Жемісті жылдың жетістіктері паш етілген биылғы «Алтын күз» мерекесі Түркістан облысы әкімдігінің мəдениет орталығында өтті. Мерекелік шараға ауыл шаруашылық еңбеккерлері мен шаруа қожалық төрағалары мен аудан қала əкімдері қатысты. Ал мерекеде сөз алған облыс əкімі Өмірзақ Шөкеев барша аграрлық сала еңбеккерлерін жылдық қорытынды мерекемен құттықтап, салада жоғары нəтиже көрсеткен аудан-қала əкімдеріне жəне еңбек озаттарына арнайы марапаттарды табыс етті. Айта кетсек еліміздің ауыл шаруашылығында Түркістан облысының үлесі 12% — ды құрайды. Әлемде және елімізде орын алған карантиндік шараларға қарамастан, жыл басынан бері 706,1 мың тонна өнім экспортталып, 90,5 млн. АҚШ долларын құрады. Оның ішінде өсімдік шаруашылығы бойынша 692 мың тонна және мал шаруашылығы өнімдері 14 мың тоннаны құрайды.
Облыс экономикасының басты драйвері – ауыл шаруашылығында жыл басынан бері 522,7 млрд. теңгенің өнімі өндіріліп, өсім 103,5%-ды құрады. Барлық шаруашылықтарда мал басы көбеюде. Атап айтқанда, ірі қара мал басы 1,1 млн бастан, қой мен ешкі – 4,4 млн бастан асады. Түйе 16,2%-ға артып, 34,1 мың бастан асқан. Ал ет өңдеу кәсіпорындарының жүктемесі 158,4 мың тоннаны құраса, сүт өндіру 600,5 мың тоннадан асқан.
Республикада ірі қара мал етін экспорттау бойынша облыс 1 орында. Өзбекстан, Ресей елдеріне 5343,8 тонна сиыр еті, Өзбекстан, Иран, Бахрейн, Ресей елдеріне 301,1 тонна қой еті, Өзбекстан, Ресей елдеріне 33,8 тонна жылқы еті экспортталған. Сонымен қатар, Ресей, Украина, Белоруссия елдеріне 133,4 мың тонна бақша өнімдері экспортталды. 1690,8 тонна балық өнімдері Еуропа (Германия, Литва) және Ресей, Украина, Өзбекстан елдеріне 13 тонна шұжық өнімдері және 1876,9 тонна құс еті Ресейге экспортқа шығарылған.
Сонымен биылғы «Алтын күз 2020» мерекесінде ала жаздай дала төсінде еңбек етіп мол өнімге қол жеткізген еңбек озаттары мен үздік нəтиже көрсеткен аудан қала əкімдері арнайы марапаттарға ие болды.
Ал ауыл шаруашылығының барлық көрсеткіштерін орындауда Қазығұрт ауданы көш басынан көрінсе, екінші орын Отырар ауданы, ал үшінші орынға Сайрам ауданы лайық деп танылды. Шардара ауданында балық шаруашылығымен айналысатын «Хамит» ӨК-нің төрағасы Бахытжан Серманизов «Ауыл шаруашылығы саласының үздігі» төсбелгісімен марапатталды.