Елбасының курстасы, КСРО Мемлекеттік сыйлығының лауреаты, Қазақстанның құрметті металлургі, Түркістан облысының және Шымкент қаласының «Құрметті азаматы», «Құрмет» орденінің иегері Аманәлі Әбдірамановтың ұлылардың мекені Ұлытауға алғаш рет келуі. Исі қазақтың тұтастығының алтын діңгегінің саф ауасымен терең тыныстаған ол ұлт ұясына айналған қасиетті мекеннің рухани астанамен байланысын ішкі туризм мен қоғамдық делегацияның жасампаз жұмысы нығайта түсетіндігін айтады. Тұңғыш Президент-Елбасының «Ұлы даланың жеті қыры», «Рухани жаңғыру: болашаққа бағдар» бағдарламалық мақалаларының түпкі мақсаты да рұхани құндылықтарымызды ұлықтап қана қоймай, еліміздің ертеңгі тұтқасы жастарға ата-бабаларымыз найзаның ұшымен, білектің күшімен сыйлап кеткен мұраларды сақтау, әрі насихаттау болып табылады.
Сол себепті де жергілікті әкімдіктің өкілдеріне Түркістанның төрінен әкелген арнайы сыйын табыстап, мемлекеттік қызметшілерге ақ батасын берді. Қос тараптың келелі кездесуі әсерлі әңгімелерді еске алумен өрбіді. Аудан әкімінің орынбасары Бағдат Байжантаев Ұлытаудың қасиетін қастерлеп, арнайы келген делегация мүшелеріне алғысын білдірді.
Сапар Жезді кенті Мәкен Төрегелдин атындағы музейде жалғасын тапты. Ұлытау өңіріндегі ежелгі қалалар орнынан табылған пештердің дәлме-дәл көшірмелері музейге қойылған. Елбасы осы пеште көне әдіспен ең алғаш рет мыс құйып көрген. Аманәлі Әбдіраманов Елбасымен қызмет еткен жылдарын, жастық шақтарын қуанышпен еске алды.
Мұражай «Ұлы Жібек жолының» бір тармағында орналасқан.
1994 жылы 3 қарашада Қазақстан Республикасының Тұңғыш Президенті Н.Ә.Назарбаев мұражайға арнайы келіп, оның рөлі мен маңызына жоғары баға берді. Мұражай өз саласында Қазақстанда ғана емес, Орта Азия мемлекеттерінің ішінде де тұңғышы болып табылады.
Тәуелсіз Қазақстан тарихында тұңғыш болып осы көне пештермен таза мыс балқытып көрген Елбасы Нұрсұлтан Әбішұлы Назарбаев екенін айта кету керек.
Сондай-ақ Елбасының курстасы Ұлытау өңіріне жасаған сапарында Ұлық ұлыстың негізін қалаған — Жошы ханның кесенесіне, алты Алаштың басын қосқан Алаша хан және Домбыауыл кесенелеріне зиярат етті.
Жезқазған қаласындағы «Дидар » телеарнасында қонақта болған Аманәлі Әбдіраманов Елбасымен өткен жиырмасыншы ғасырдың еншісіндегі жастық кезеңдерін еске алып, еліміздің бүгіні туралы келелі ой қозғады. Осылайша Елбасының курстасы Сарыарқаның төрінде ескірмейтін естелігімен бөлісті.