Шымкент қаласының әкімі Мұрат Әйтенов коронавирус эпидемиясының болжамды жаңа толқынына дайындық жұмыстары шеңберінде мегаполистегі «Kazmedpribor» кәсіпорнында болды. Мекеме медициналық құрал-жабдықтар, медициналық жиһаздар және медициналық көліктер шығарумен айналысады. Қазіргі уақытта өкпені жасанды жолмен тыныстандыратын трубиналық аппараттар құрастыру ісін мықтап қолға алған кәсіпорын осы ай ішінде Шымкент қаласындағы денсаулық сақтау мекемелеріне қажетті 88 данасын дайындайды.
Айта кету керек «Kazmedpribor» ЖШС- де 1 күнде 20-25 ИВЛ аппараттары құрастырылып жатса, кәсіпорын жыл соңына дейін тағы 500 дана осы жабдықтың түрін жасап, еліміздің өзге де облыстарына жеткізуді көздеп отыр. Бүгінгі таңда өкпені жасанды тыныстандыру құрылғыларын жасау үшін 55 пайыз отандық өнім пайдаланылады. Қалған бөлшектер АҚШ, Қытай, Германия елдерінен тасымалданады екен. Ең бастысы жергілікті жерде құрастырылған ИВЛ аппараттарының бағасы нарықта едәуір төмен, әрі сапасы да бәсекелестікке төтеп бере алады. Сондықтан коронавирус індетінің болжамды толқынына дайындық бойынша қажетті медициналық жабдықтың бұл түрінен тапшылық болмайтын көрінеді. Оған қоса кәсіпорын биылдан бастап антисептик түрлерін шығаруды да жүзеге асыра бастаса, мекеме тәулігіне 1500 литр антисептик сұйықтықтарын өндіруге қауқарлы. Қуат көлемі жылына 50 мың дананы құрайды. Кәсіпорынның жылына 150 мың дана медициналық жиһаз түрлері мен 1000 дана медициналық көлік түрлерін құрастырып шығаруға мүмкіндігі бар.
